Openbare verhore oor grondonteiening afgehandel

land-lugfoto-grond-landbou

Foto: Magda Ehlers/Pexels.com

Die parlementêre gesamentlike grondwetlike hersieningskomitee het Saterdag die provinsiale openbare verhore oor artikel 25 van die Grondwet in Kaapstad afgehandel met een van die grootste vergaderings tot nog toe.

Die komitee, wat altesaam 34 verhore in al nege provinsies van Suid-Afrika gehou het, is deur die nasionale vergadering en nasionale raad van provinsies opdrag gegee om te bepaal of ʼn hersiening van hierdie artikel en ander klousules nodig is om grondonteiening sonder vergoeding, in openbare belang, moontlik te maak. Die komitee moes ook aanbevelings maak watter grondwetlike wysigings nodig sal wees.

Honderde lede van die publiek het Saterdag se verhoor by die Friend of God Church in Goodwood bygewoon. Die kerk het ʼn kapasiteit van 1 500. Lang rye mense het nog tydens die verhoor buite gestaan terwyl persone hul insette gelewer het.

Vincent Smith, medevoorsitter van die komitee, het gesê hy is vol vertroue dat dit ʼn demokratiese proses was. “Almal wat ʼn geleentheid wou hê om te praat is toegelaat om sy sê te sê. Die komitee het toegelaat dat demokrasie seëvier.”

Sy eweknie, medevoorsitter Lewis Nzimande, het met hom saamgestem. “Selfs al was dit ʼn volgepakte saal vol emosie, was die mense van Suid-Afrika geduldig en het hulself gedra. Die komitee is trots op die verdraagsaamheid wat mense getoon het, selfs toe hulle heeltemal van sprekers verskil het. Dit wys hoe die hele Suid-Afrika in die algemeen saamwerk – ons gun almal hul siening.”

Smith het gesê die komitee sal nou, ná die verhore, honderde duisende geskrewe insette hersien en diegene wat aangedui het dat hulle graag mondelings in die parlement aangehoor wil word, sal genooi word om dit te doen.

“Hierdie proses kan dalk lank duur, aangesien ons ʼn groot reaksie gehad het op die saak. Ons wil seker maak dat ons ʼn deeglike werk doen,” het Smith verduidelik.

Sodra die proses afgehandel is, sal die multiparty-komitee breedvoerig samesprekings hou oor die saak voor dat daar aan die parlement terugvoer gegee word.

Die ANC het egter vandeesweek aangekondig dat hy voortgaan met sy plan om die artikel te wysig. ANC-leier en president van die land, Cyril Ramaphosa, het Dinsdag gesê sy party sal, deur die “parlementêre proses, ʼn voorgestelde wysiging aan die Grondwet afhandel wat die voorwaardes duidelik stel waarvolgens grond sonder vergoeding onteien kan word”.

Die ANC in die Wes-Kaap het Saterdag die komitee gelukgewens dat hy die verhore suksesvol afgehandel het. “Die mense van die Wes-Kaap het gepraat. Van Oudtshoorn tot Beaufort-Wes, Citrusdal tot Swellendam, en uiteindelik Kaapstad, ons mense het onomwonde en oorwegend gesê artikel 25 van die Grondwet moet gewysig word.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

26 Kommentare

jongste oudste gewildste
Die Stem

Hoewel ek my stem ook laat hoor het, het ek geen vertroue in die proses nie.
CR het reeds aangekondig dat die regering voortaan met hul beplan ING.
Hierdie proses is dus net oëverblindery en n vreeslike onnodige uitgawe.
Daar is geen kans dat die goeddeurdagte redenasies en sienswyses, van mense wat aan die prises deelgeneem het, in ag geneem gaan word nie.

Snowball

En so eindig nog ‘n klug onder regie van die ANC, wat kunsmatige geloofwaardigheid aan die grootste leuen en sirkus in SA verkry, deur mense te laat glo hierdie verhore gaan enigsens ‘n rol speel in die wysiging van die grondwet en die grondonteiening wat gaan volg. CR has spoken.. die res is net formaliteite.

Chris

Nog n klug. Hulle het lankal klaar besluit. Hulle is magsbehep en wil die land verder vernietig. Rommelstatus is nie goed genoeg vir hulle nie.

Jannie

WAT ‘N TOTALE KLUG WAS DIT NIE…’N VERMORSING VAN TYD…EN DIT VIR ‘N VOORAF OPGESTELDE AGENDA!!!

Paul

Die prosedure soos per die grondwet vereis is geminag, vat CR en die ANC hof toe!