Opknapping by 1 Militêr ʼn ‘vermorsing van geld’

1 Militêre Hospitaal

Die 1 Militêre-hospitaal in Pretoria. (Foto: Facebook / 1 Military Hospital)

Die gesamentlike staande komitee oor verdediging is uiters bekommerd oor die uitgerekte, peperduur opknappingswerk aan die eerste verdieping van die 1 Militêre-hospitaal in Pretoria.

Die herstel-en-onderhoudprogram (Ramp) is in die finansiële jaar 2005-’06 van stapel gestuur en het reeds meer as R1 miljard gekos.

Boonop het die departement van verdediging al meer as R627 miljoen aan mediese uitkontraktering weens die gesloer van die projek bestee.

Die komitee het Vrydag in ʼn verklaring gesê dié projek put die departement se reeds beperkte begroting nóg meer uit.

“Gevolglik het die komitee versoek dat ʼn forensiese verslag wat deur die voormalige hoof van die weermag aangevra is, asook vordering rakende die toepassing van aanbevelings in dié verslag aan die komitee verskaf word.

“Ons vind dit uiters problematies dat die Ramp steeds nie afgehandel is nie. Die projek tap geld sonder ophou, wat ʼn negatiewe uitwerking op die fiskus het,” sê Elleck Nchabeleng, medevoorsitter van die komitee.

Die komitee sê hoewel hy die verdedigingswerke-formasie (Defence Works Formation) se voorneme om die projek te finaliseer verwelkom, is die onsekerheid rakende finansiering en die beplande 29 maande om die projek af te handel tog onrusbarend.

Luidens die verklaring het die hospitaal sy akkreditasie as ʼn vlak 4-hospitaal by die Afrika-unie en Verenigde Nasies verloor om eksterne en interne vredesbewaringsoperasies te ondersteun. Dít word grootliks toegeskryf aan die nie-voltooiing van die Ramp.

“Wat kommerwekkend is, is dat ons nie die waarde van die uitgawes bevredigend kan uitwys nie,” sê Cyril Xaba, medevoorsitter van die komitee.

Die komitee het onderneem om die hospitaal weer te besoek om agter die kap van die byl te kom en verantwoordbaarheid te verseker.

Dít sluit ʼn duidelike uiteensetting van alle uitgawes wat tot dusver aangegaan is, asook die nodige optrede teen alle betrokke amptenare en diensverskaffers wat by enige moontlike wanpraktyke betrokke was in.

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

18 Kommentare

jongste oudste gewildste
casper

AAG — Net nog ‘n ANC kader wat geld maak deur sy tenderpreneneurs kennis.
Niks belangrik nie !!

Anel

Die hispitaal is nie eers so oud nie. Hy kan eintlik maar toe maak. Ek hoor maar hoe kla die lede. Meeste operasies word by privaar hospitale gedoen en dan moet die mense in 1Mil aansterk. Verder wag hulle dae vir hul kronisie medikasie en ander medikasie word by privaat apteke gekry, want die hospitaal se apteek het nooit niks nie. So, om so baie geld te spandeer op een vloer, kon hulle maar die plek gesloop het en ‘n heel nuwe hospitaal gebou het. Ek glo dit sou goedkoper gewees het.

Johan

Nog n komitee en beloftes ek was ook n pasient daar maar 4 keer weg gewys oor teaters wat nie werk nie operasie uit gevoer by private hospitaal 5 jaar later

Kokerboom

Weer ‘n kwessie van GEEN aanvaarding van verantwoordelikheid en aanspreeklikheid. Geen benul van waarde en skaarsheid van geld!Volslae onvermoee en onbevoegdheid van die huidige kader regering!

Eiervrug

Wha haaa!!!. Wonder wie besluit het op RAMP. Ek dink daardie persoon is ‘n siener….