Oscar Pistorius intimideer glo staatsgetuie

Oscar Pistorius op 6 Mei 2014 in die hof Foto: Alon Skuy/Times Media Group/Pool

Oscar Pistorius op 6 Mei 2014 in die hof Foto: Alon Skuy/Times Media Group/Pool

Oscar Pistorius het Dinsdag glo ʼn “baie onrusbarende” uitlating aan ʼn staatsgetuie en vriendin van Reeva Steenkamp gemaak.

“Oscar Pistorius het my kliënt, Kim Myers, vandag in die hof genader en haar gevra ‘hoe slaap jy snags?’,” het Ian Levitt, prokureur vir Myers, in ʼn verklaring gesê.

“Hy wou uiteraard nie weet of sy haar volle agt ure slaap inkry nie,” het Levitt aan AFP gesê. “Dit was onrusbarend bedoel.”

Die Myers-gesin het Levitt aangestel om hulle te verteenwoordig kort nadat Pistorius Steenkamp op 14 Februarie 2013 in sy huis in Pretoria-Oos doodgeskiet het. Steenkamp was glo baie geheg aan Cecil en sy vrou Desi en hul dogters Kim en Gina. Cecil het as Steenkamp se “Jo’burg Pa” bekend gestaan.

Pistorius se regspan ontken dat die 27-jarige atleet Myers intimideer het. “Ek gaan dit nie eers verwerdig met kommentaar nie,” het Brian Webber aan verslaggewers gesê. “Dit is heeltemal vals. Hy het nooit iets van die aard gesê nie.”

Levitt sê Myers, wat gereeld in die eerste ry van die publieke galery sit, hou vol dat sy die woorde gehoor het. “Sy volstaan met dit wat sy gehoor het,” het Levitt gesê. “Hy [Pistorius] het dit gesê. My persoonlike mening is dat hy in ontkenning is en al ʼn geruime tyd lank so is.”

Staatsaanklaer Gerrie Nel het gepoog om te bewys dat Pistorius nie skuld kan aanvaar vir sy dade nie. Nel het die atleet se weergawe as ʼn “leuen” bestempel en aangevoer Pistorius het presies geweet wat hy doen toe hy die skote gevuur het.

Pistorius het ontken dat hy Steenkamp doelbewus geskiet het en het onskuldig gepleit op ander aanklagte, insluitend een dat hy ʼn vuurwapen deur die oop sondak van ʼn bewegende motor gevuur het.

Stephen Tuson, ʼn dosent in die regte aan die Universiteit van die Witwatersrand, het gesê indien Pistorius die uitlating tydens die ondersoekende fase van die hofsaak aan ʼn staatsgetuie gemaak het, was dit baie ernstig. Aangesien die staat egter reeds sy saak afgehandel het, is dit onwaarskynlik dat die uitlatings enige gevolge in die hof gaan hê. “Dit was onverstandig,” het Tuson gesê. “Veral om dit in die hof voor almal te doen. Dit skep nie ʼn goeie indruk nie.” -SAPA

Klik hier om die hooftrekke van die hofverrigtinge gratis op Maroela Media te volg.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

26 Kommentare

jongste oudste gewildste
Ina

Ek glo die vrou soek publisiteit, aandagsoeker.

Mona

Ek wil weet hoe kry hy dit reg om so lekker te lag. Ek sou nie kon nie as ek iemand dood geskiet het nie.

tanya

Mensies. Mensies ons was nie daar om te weet wat gebeur het nie net hy en God weet wat gebeur het dit maak nie saak of hy skuldig of onskuldig is nie kom ons los die oordeel vir God sodat God dit kan doen nie ons nie

Lynni

Dalk soek sy publisiteit. Sy is mos nooit geroep om as getuie te getuig ni. Soek voorbladberig en geld.

Lynni

Kyk maar, na di hofsaak gaan daar groot geldeise kom. Wie gaan daai regsmense betaal wat langs Reeva se familie en vriende sit? En ANC vroueliga betaal Reeva se ma en di se vriendin se verblyf.