Oscar Pistorius op borgtog vrygelaat

oscar-pistorius

Oscar Pistorius op 21 Oktober 2014 in die Pretoriase hooggeregshof tydens vonnisverrigtinge Foto: Themba Hadebe/AP/Pool

Die hooggeregshof in Pretoria het Dinsdagoggend borgtog aan die voormalige Paralimpiese atleet Oscar Pistorius toegestaan.

Adjunkregterpresident Aubrey Ledwaba het borgtog van R10 000 aan Pistorius toegestaan. Sy borgtogvoorwaardes behels dat hy sy oom se huis in Waterkloof daagliks tussen 07:00 – 12:00 mag verlaat maar slegs in ʼn radius van 20 km. Indien hy die huis op ʼn ander tyd wil verlaat, moet hy toestemming van die ondersoekbeampte bekom. Pistorius moet ook sy paspoort inhandig en sal elektronies gemonitor word.

Die saak is uitgestel tot 18 April. Die staat het nie Pistorius se borgtogaansoek teengestaan nie maar wel daarop aangedring dat dit onderhewig moet wees aan sekere voorwaardes. Adv. Gerrie Nel, die staatsaanklaer, het versoek dat Pistorius tydens sy borgtog onder huisarres moet bly, aangesien hy nou ʼn “veroordeelde moordenaar” is. Ledwaba het egter gelas dat dit nie in belang van geregtigheid is om Pistorius onder huisarres te hou nie.

Adv. Barry Roux, namens Pistorius, het voor Ledwaba sy beslissing gemaak het, aangevoer dat Pistorius bereid is om talle van die voorwaardes op te gee wat gegeld het terwyl hy onder korrektiewe toesig was, om te verseker dat hy op borgtog vrygelaat word. Pistorius se regspan het ook aangedui dat hulle wil appelleer teen die appèlhof se beslissing dat Pistorius skuldig is aan moord.

Die appèlhof in Bloemfontein het Donderdagoggend gesê die voormalige Paralimpiese atleet het sy vriendin Reeva Steenkamp op 14 Februarie 2013 vermoor.

Regter Eric Leach het die eenparige uitspraak voorgelees. Hy het gelas dat Pistorius aan moord skuldig bevind moes word en nie aan strafbare manslag nie. Die saak is terugverwys na die hooggeregshof vir nuwe vonnisoplegging.

Die staat het op 3 November in die appèlhof aangevoer dat Pistorius op die ernstiger aanklag van moord skuldig bevind moet word nadat hy Steenkamp doodgeskiet het.

Regter Thokozile Masipa het Pistorius op 12 September 2014 skuldig bevind aan strafbare manslag, maar nie aan moord nie. Pistorius het aangevoer hy het vier skote deur die geslote deur van sy toilet in sy huis in Pretoria gevuur, omdat hy onder die indruk was dat ʼn inbreker daar wegkruip.

Hy het op 21 Oktober 2014 sy vonnis begin uitdien nadat hy tot vyf jaar tronkstraf gevonnis is ingevolge art. 276 (1)(i) van die Strafproseswet. Hiervolgens moes hy ʼn sesde (tien maande) van sy vonnis uitdien voordat die nasionale kommissaris van korrektiewe dienste dit kon oorweeg om sy vonnis in korrektiewe toesig om te skakel. Hy het op 21 Augustus tien maande tronkstraf uitgedien.

Pistorius is in Oktober 2015 uit die Kgosi Mampuru II-gevangenis in Pretoria vrygelaat en het hierna sy vonnis onder korrektiewe toesig in sy oom se luukse herehuis in Waterkloof begin uitgedien.

Lees alle vorige berigte oor Oscar Pistorius op Maroela Media.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

59 Kommentare

jongste oudste gewildste
alida

Ag kom tog by Maroela. Ons weet almal sy oom bly in ‘n luukse huis. So what as hulle dit kan bekostig hoekom nie. Hou tog op om sensasie uit te lok !!!

Bloues

Dit is belaglik. Veroordeelde moordenaar op borgtog van R10 000. Dit gaan my vrstand te bowe

Leeutjie

Ek se weer wat ek op die vorige berigte gese het. Ek beskou die hele saak objektief. Dit maak nie saak of Oscar vry is en of hy gaan sit nie, hy gaan die res van sy lewe met dit moet saamleef! Indien hy dit wel gedoen het is dit sy saak met God! Ons wat nie daar was nie sal nooit met sekerheid kan se wat daar gebeur het nie. Ons kan bespiegel daaroor maar om hom sleg te se gaan nie van ons ‘n beter mens maak nie!

ME

Jy Oscartjie hoort nie in n LUUKSE huis te wees nie, maar in jou tronksel.

alida

ME Jy bly seker in ‘n glashuis ne? Wag tot daardie wolf aan jou eie deur klop !!!! Duisende mense bly in luukse huise hoekom moet Maroela dit elke keer beklemtoon. Die koerante maak mens siek.