Oscar Pistorius skuldig bevind aan moord

Oscar Pistorius tydens sy verhoor. Foto:  Kim Ludbrook/EPA/Pool

Oscar Pistorius tydens sy verhoor. Foto: Kim Ludbrook/EPA/Pool

Die appèlhof in Bloemfontein het Donderdagoggend gesê die voormalige Paralimpiese atleet Oscar Pistorius het sy vriendin Reeva Steenkamp op 14 Februarie 2013 vermoor.

Regter Eric Leach het die eenparige uitspraak voorgelees. Hy het gelas dat Pistorius aan moord skuldig bevind moes word en nie strafbare manslag nie. Die saak is terugverwys na die hooggeregshof vir nuwe vonnisoplegging. Leach het gesê daar was ʼn paar opsies vir die appèlhof om te oorweeg in die lig van sy bevindinge. Hy het gesê dit sal “geheel onprakties” wees om Pistorius weer te verhoor.

Leach het gesê die verdediging se verweer dat Pistorius se optrede regverdig kan word weens sy gestremdheid en angs, is onaanvaarbaar. Volgens Leach is Pistorius goed opgelei rakende die hantering van vuurwapens en moes hy kon voorsien dat hy die persoon agter die badkamerdeur sou doodskiet. Leach het gesê dit kom op dolus eventualis neer wat beteken ’n beskuldigde kan voorsien dat sy aksie ’n mens kan doodmaak, maar nogtans daarmee voortgaan.

Leach het na die saak verwys as ʼn menslike tragedie van “Shakespeare-agtige omvang”. Hy het na die agtergrond van die saak verwys naamlik toe Pistorius en Steenkamp mekaar ontmoet het en die daaropvolgende gebeure in hulle verhouding.

Daar is ook na die verloop van gebeure van die aand wat sy doodgeskiet is verwys, sowel as die omstandigheidsgetuienis wat tydens Pistorius se verhoor gelewer is. Leach het ook verwys na die uitspraak in die hooggeregshof wat bevind het dat Pistorius ʼn swak getuie was en dat sy weergawe van die gebeure dikwels verander het.

Leach het verder verwys na die vertolking van dolus eventualis. Hy het gesê die appèlhof kan nie inmeng met die hooggeregshof se besluit aangaande die feite in die saak nie. Daar is ook onderskei tussen dolus eventualis en dolus directus (moord met direkte opset).

Leach het regter Thokozile Masipa se toepassing van dolus eventualis as “verwarrend” beskryf. Volgens Leach is die verkeerde toets toegepas en was die vraag eintlik of Pistorius geweet het ʼn mens kan doodgaan en nie net of Steenkamp kan doodgaan toe hy skote op die badkamer afgevuur het nie. Hy het gesê alle omstandigheidsgetuienis moet oorweeg word en dat van die getuienis nie net geïgnoreer kan word nie. Volgens Leach het Masipa regsfoute gemaak.

Die staat het op 3 November in die appèlhof aangevoer het dat Pistorius op die ernstiger aanklag van moord skuldig bevind moet word nadat hy Steenkamp doodgeskiet het.

Masipa het Pistorius op 12 September 2014 skuldig bevind aan strafbare manslag, maar nie aan moord nie. Pistorius het aangevoer hy het vier skote deur die geslote deur van sy toilet in sy huis in Pretoria gevuur, omdat hy onder die indruk was dat ʼn inbreker daar wegkruip.

Pistorius is in Oktober uit die Kgosi Mampuru II-gevangenis in Pretoria vrygelaat en dien tans sy vonnis onder korrektiewe toesig uit in sy oom se luukse herehuis in Waterkloof.

Pistorius het op 21 Oktober verlede jaar sy vonnis begin uitdien nadat hy tot vyf jaar tronkstraf gevonnis is ingevolge art. 276 (1)(i) van die Strafproseswet. Hiervolgens moes hy ʼn sesde (tien maande) van sy vonnis uitdien voordat die nasionale kommissaris van korrektiewe dienste dit kon oorweeg om sy vonnis in korrektiewe toesig om te skakel. Hy het op 21 Augustus tien maande tronkstraf uitgedien.

Klik hier vir alle vorige berigte oor Oscar Pistorius op Maroela Media.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

134 Kommentare

jongste oudste gewildste
Bach

Uiteindelik die korrekte vertolking van die regspunt. Reg het nou geskied.

Se Maar Net

Dankie!! Uiteindelik word daar reg en regverdiging toegepas.
Niemand is verhewe die reg nie. Jammer maar dit is feite!! Hy het gemoor en daarom moet hy gestraf word. Ek verlekker my glad nie in sy situasie nie, maar die hele uitspraak vroeer was
totaal onregverdig.

Marie Salzwedel

In alles wat jy doen het KARMA altyd die laaste se!!!! Geregtigheid geskied.

Hennie

Reg en geregtigheid het geskied! Baie geluk dat julle die moed van julle oortuiging gehad het, Hooggeregshof!!!!

Anel

Fantastiese NUUS!!!!!!!!!!Die gereg het wakker geskrik. RIV Reeva……ou Oscar PIS-torius moet maar sy MOORD klag gaan uitdien. JUSTICE FOR REEVA