Oud-Bokkaptein Theuns Stofberg ernstig beseer in ongeluk

Die oud-Springbokkaptein Theuns Stofberg is in ’n ernstige toestand in die hospitaal nadat hy Maandagaand in ’n motorongeluk betrokke was.

Stofberg (68) was omstreeks 19:45 in ʼn trompop botsing op die R304-pad buite Stellenbosch in die Wes-Kaap betrokke.

Hy is in ʼn kritieke toestand na ʼn hospitaal gehaas en word tans steeds in die intensiewe sorgeenheid behandel. Sy pelvis en sommige van sy ribbes is gebreek. Hy moes ook ʼn operasie ondergaan om inwendige bloeding te stop, het ʼn bloedoortapping ondergaan en is tans aan ʼn ventilator gekoppel.

Volgens sers. Wesley Twigg, polisiewoordvoerder, het ʼn vrou in die ander voertuig tydens die ongeluk omgekom.

“Die omstandighede rondom die ongeluk word ondersoek,” sê Twigg. “Enigiemand met meer inligting kan die Stop Misdaadnommer by 08600 10111 skakel.”

Gebede en boodskappe van beterskap vir die oud-Springbokkaptein het intussen op sosiale media  begin instroom.

The Waterhole Rugby Museum, Global Sports News en SupaRugby het op hul Facebook-blad gevra dat mense vir Stofberg se spoedige herstel sal bid.

Die FAK het sy skok oor die ongeluk te kenne gegee. Stofberg is die kleinseun van NJ van der Merwe, die eerste hoof en een van die medestigters van die FAK.

In 2019 het Stofberg die brons borsbeeld van sy oupa by die FAK-kantoor onthul ter herdenking van die organisasie se 90ste bestaansjaar.

Dr. Danie Langner, besturende direkteur van die FAK, wens Stofberg ’n spoedige herstel toe.

“Theuns is werklik ʼn sportpionier vir Suid-Afrika. Hy word gesien as een van die beste spelers wat nóg die Groen-en-goud aangetrek het en is ʼn ambassadeur vir ons land,” sê Langner.

“Hy en sy familie is in ons gebede in hierdie moeilike tyd.”