Oud-prof beskuldig van rasse-uitlating by restaurant

Leon de Kock (Foto: Leon de Kock/Facebook)

Prof Leon de Kock (62), ‘n emeritus-professor van die Universiteit Stellenbosch en skrywer, staan tereg op aanklag van crimen injuria ná uitlatings wat hy na bewering by ʼn restaurant in Observatory in Kaapstad gemaak het.

Lt.kol. Andre Traut, woordvoerder van die polisie, het aan Maroela Media gesê De Kock is op 9 Mei in hegtenis geneem. “ʼn Werknemer van die restaurant het gesê sy was besig om die restaurant skoon te maak, toe ʼn manlike klant rassistiese en aanstootlike opmerkings gemaak het teenoor haar. Sy het die saak by Woodstock-polisiestasie aangemeld.”

Traut het gesê die beskuldigde is in hegtenis geneem en hy het op 10 Mei in die Kaapstadse landdroshof verskyn op aanklag van crimen injuria.

De Kock is ’n literêre vertaler, digter, skrywer en akademikus wat reeds meer as 15 boeke die lig laat sien het, waaronder drie digbundels, ’n roman, akademiese boeke, vertalings, en talle geredigeerde akademiese werke. Sy jongste werk is André P. Brink en die spel van die liefde, die eerste biografie van Brink, wat vandeesmaand deur Jonathan Ball Uitgewers vrygestel word. De Kock het in 2015 op vervroegde pensioen gegaan.

ʼn Vrou het op sosiale media aangevoer sy het gesien hoe De Kock die vrou die k-woord noem. Sy voer aan hy het ook ʼn ander vrou seksueel geteister.

De Kock se seun, Luke, het in ʼn plasing op Facebook om verskoning gevra vir sy pa se gedrag. Hy het gesê sy pa sukkel al die afgelope drie maande met sy sielkundige welstand. “Ek herken nie my pa nie,” het hy gesê. Volgens hom is sy pa ná die inhegtenisneming na Groote Schuur-hospitaal geneem vir ʼn psigiatriese ondersoek. “Ek vra onvoorwaardelik om verskoning vir sy gedrag. Dit is nie my pa nie. Hy was onder die invloed van verskeie voorskrifmedikasie, alkohol en hy het ʼn paar aande lank nie geslaap nie.”

Luke het gesê hy hoop dat hulle De Kock na ʼn instansie kan oorplaas waar hy behoorlike versorging kan kry.

Martin Viljoen, woordvoerder van die Universiteit Stellenbosch, het aan Maroela Media gesê die universiteit ondersoek tans klagtes wat ontvang is wat betref die gedrag van prof. de Kock, ‘n emeritus-professor van die instelling. “Die US het tot dusver nie inligting oor sy gesondheidstatus ontvang nie, maar selfs as ons ingelig sal word, sal ons nie in ’n posisie wees om enige persoonlike inligting aan die media te verskaf nie,” het hy gesê.

Traut versoek enigiemand met meer inligting oor die voorval om die ondersoekbeampte, konst. Dumetri Onverwaght, by die Woodstock-polisie te kontak by 021 486 2840.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

40 Kommentare

jongste oudste gewildste
Johan

Sulke situasies is altyd betreuringswaardig. Dit is nie goed vir ons land nie.

Gert

Maar Julius Malema kan sê net wat hy flippin wil en dit is reg!!!!
Wonder maar net??

Valerie

Groot van die seun om die waarheid te praat.

Johan

Prof ontken alles. Malema kan ons sleg se dan gebeur daar niks. Wonder of die wit mense weet wat beteken die woord legoa. Dis wat ons genoem word

TLC

Die bietjie wat em weet beteken legoa net eintlik “witmens”
Help my reg as ek verkeerd is
Maar wat ek wel weet hy por sy mense om die witmens dood te maak en nog en nog en nog