’n Voormalige werknemer van die Oos-Kaapse departement van gesondheid het Dinsdag skuldig gepleit op aanklagte van bedrog, korrupsie en geldwassery. Baxolile Ngoloyi het meer as R357 000 van die departement gesteel terwyl hy as logistieke beampte daar gewerk het.
Adv. Tjaart van Zyl het in die handelsmisdaadhof in Port Elizabeth Ngoloyi se pleit aanvaar en landdros Nolitha Bara het Ngoloyi skuldig bevind op aanklagte van korrupsie, vyf aanklagte van bedrog en vier aanklagte van geldwassery.
Sithembile Smith, met wie Ngoloyi saamgesweer het, het verlede jaar in Augustus skuld beken op ’n aanklag van geldwassery en is vyf jaar opgeskorte vonnis opgelê. Hy het ook staatsgetuie geword.
Anelisa Ngcakani, woordvoerder van die Nasionale Vervolgingsgesag (NVG) in die Oos-Kaap, sê die departement het die Logistieke Inligtingstelsel (LOGIS) gebruik vir die aanskaffing en verkryging van goedere en dienste. Ngoloyi het saam met ander personeellede aan LOGIS gewerk om betalings aan verskaffers te verwerk.
“Van 11 Desember 2017 tot 6 Junie 2018 het hy met Sithembile Smith, die direkteur van Eza Services and Suppliers, ’n konstruksiemaatskappy in Cookhouse, saamgesweer. Hy het geld van die departement se bankrekening na Eza se bankrekening bedrieglik oorbetaal,” sê Ngcakani.
Ngoloyi het voorgegee dat dienste deur Eza aan die departement gelewer is en sowat R357 268 as gevolg daarvan in dié maatskappy se rekening inbetaal. Hy het dié geld egter in sy sak gesteek en ’n klein bedrag aan Eza in ruil daarvoor betaal.
“Hy het skuld beken dat hy die betalings op LOGIS bedrieglik verwerk het deur die gebruikersname van ander personeellede te gebruik wat gewoonlik deel was van die proses om betalings te verwerk.”
Ngoloyi sal na verwagting weer op 3 Mei in die hof verskyn wanneer hy dan gevonnis sal word.
BEE.
Klein vissies… Gaan die geld terug betaal word ek wonder mmmmm. Ons soek die groot visse in die parlement ASB!
NIks nuut oor al die BEEE goed nie.
Maar NVG is traag om vervolging te initieer op regeringsamptenare. Wie probeer hulle bluf?