Oudpolisiekommissaris doen poligraaftoets oor ‘Bird-Island’-bewerings

Genl. Johan van der Merwe by Charles Kemp. Foto: Verskaf.

Genl. Johan van der Merwe, oudpolisiekommissaris, het Woensdag ʼn poligraaftoets ondergaan nadat hy Sondag in die briewerubriek in Rapport geskryf het dat hy bereid is om ʼn leuenverklikkertoets af te lê in ʼn poging om sekere bewerings wat in die omstrede boek Die seuns van Bird Island vervat is, te weerlê.

Die proses is deur PretoriaFM gefasiliteer. Die toets is deur Charles Kemp, ʼn poligraaf verbonde aan die Poligraaf Instituut van Suid-Afrika (Pisa) uitgevoer.

Die fokus van die poligraaftoets was spesifiek die beweerde verdwyning van die dossier wat Magnus Malan, oudminister van verdediging, en Barend du Plessis, oudminister van finansies, by ʼn beweerde pedofielnetwerk betrek.

Mark Minnie, medeskrywer van die boek en oudspeurder, het beweer dat die dossier met inligting wat hy saamgestel het oornag uit sy kantoor verdwyn het.

Kemp het gesê die volgende vier vrae is aan Van der Merwe gevra.

  • Was u bewus van ʼn dossier wat mnre. Malan of Du Plessis by ʼn pedofielnetwerk betrek?
  • Het u persoonlik ʼn rol gespeel om ʼn dossier te verdoesel waarin mnre. Malan of Du Plessis by ʼn pedofielnetwerk betrek word?
  • Het u enige persone gehelp om ʼn dossier te verdoesel waarin mnre. Malan of Du Plessis by ʼn pedofielnetwerk betrek word?
  • Was u bewus van enige optrede wat gegee is om ʼn dossier te verdoesel waarin mnre. Malan of Du Plessis by ʼn pedofielnetwerk betrek word?

Kemp het gesê daar was geen beduidende indikasie van misleiding van Van der Mewe se kant af nie. “Dit is dus my opinie dat genl. Van der Merwe eerlik was toe hy die vrae beantwoord het.”

Luidens ʼn verklaring wat Woensdagmiddag laat deur PretoriaFM uitgereik is, het die poligraaftoets bevind dat Van der Merwe “die waarheid praat as hy sê dat hy nie bewus was van ʼn dossier wat die oudministers Malan en Du Plessis by ʼn beweerde pedofielnetwerk betrek nie en dat hy ook nie ʼn rol gespeel het in die beweerde verdoeseling van so ʼn dossier nie.”

Van der Merwe het tydens ʼn onderhoud met PretoriaFM gesê dit was juis vir hom belangrik om die bestaan van die dossier te bevraagteken omdat daar die afgelope tyd uit verskillende oorde verskeie bewerings gemaak is oor lede van die destydse veiligheidsmag en daar ʼn “sluier getrek word” oor die ANC se destydse terreurdade.

“Daar word nou die eensydige indruk geskep dat dit net die vorige regering en lede van die veiligheidsmagte was wat hulle skuldig gemaak het aan wandade terwyl dit in die meeste gevalle sonder enige gronde of bewyse is en aanvaar word as die waarheid.”

Genl. Johan van der Merwe by Charles Kemp. Foto: Verskaf.

Van der Merwe sê “koerante en uitgewers” sal die samelewing ʼn guns bewys om die persone wat dié soort bewerings maak beskikbaar te stel om hulself aan dié soort toetse te onderwerp en op daardie manier verseker dat hul geloofwaardigheid beskerm word.

Hy beweer ook die bewerings in die boek is vaag en kan nie nagegaan word deur middel van getuies nie omdat die getuies in die meeste gevalle dood is.

Chris Steyn, ʼn voormalige ondersoekende joernalis, en Minnie beweer in Die seuns van Bird Island dat drie voormalige ministers van die Nasionale Party in die 1980’s by pedofilie betrokke was.

Skaars twee weke ná die boek se bekendstelling is Minnie dood aangetref op ʼn vriend se kleinhoewe in Theesecombe aan die buitewyke van Port Elizabeth. Hy is met ʼn skietwond aan sy kop en ʼn vuurwapen langs hom gevind. ʼn Selfmoordbrief is op die toneel gevind.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

76 Kommentare

jongste oudste gewildste
GM

Poligraaftoetse kan ge’cheat’ word, en die Generaal beskik seersekerlik oor die kennis om dit te kan doen as hy sou wou.

Ander Annie

Dit is nie wat my kollega sê wat ‘n gekwalifiseerde poligraaf is. So el weet nie so mooi van ‘gecheat” nie.

Nuuskierig

Nou moet die oorblywende Ministers van die vorige era ook vrywillig hulle self laat toets voor die media. Dit sal nogal interesant wees !

Neutraal

Weet nie. Wat ek gelees het van poligraaftoetse kan dit nie ge’cheat word nie. Mens het geen beheer oor die reaksie van jou hart- en liggaamsreaksie as jy sou lieg nie.

Piet

Wel – dit hang alles af of die antwoorde “ja” of “nee” was!