Ouers eis ondersoek, dokters se skorsing ná 10-jarige sterf

Zayyaan Sayed (10).

Die ouers van die 10-jarige Zayyaan Sayed eis die onmiddellike skorsing van twee dokters én ʼn ondersoek na hul gedrag, nadat hul seun tydens ʼn oënskynlik roetine-operasie gesterf het.

Zayyaan het op 11 Oktober ʼn laparoskopie by die Netcare Park Lane-kliniek ondergaan nadat hy lank met refluks gesukkel het. Prof. Peter Beale, ‘n pediatriese chirurg, het die operasie uitgevoer, terwyl dr. Abdulhay Munshi die narkotiseur was. Zayyaan se ma het gesê hulle het lank gewik en geweeg om wél die operasie te laat doen, maar het eindelik ingestem.

“Dit was die laaste keer dat ek hom [Zayyaan] [lewend] gesien het. ʼn Uur en ʼn half het verby gegaan. Toe twee ure. Ek het op en af gestap. Ná twee en ʼn half ure het ek begin wonder wat aangaan…” het Zaheera Sayed gesê.

Die operasie het eindelik nagenoeg vier ure geduur. Zayyaan het later dieselfde aand gesterf.

Mohammadh en Zaheera Sayed sê nou in ʼn prokureursbrief aan die Raad vir Gesondheidsberoepe (RGB) “dit is duidelik dat Zayyaan se dood nie ʼn geïsoleerde voorval was nie.

“ʼn Hele aantal kinders het hul lewens verloor, gedurende of ná ʼn operasie deur prof. Beale,” lui die brief.

Sunday Times het vroeër berig Ethan Teubes (3) is in 2012 dood nadat Beale ʼn operasie op hom gedoen het, terwyl die 19 maande oue Alissa Strydom in 2016 onder soortgelyke omstandighede gesterf het.

Die Sayed-egpaar sê dit is noodsaaklik dat die RGB die twee dokters onmiddellik skors en dadelik ondersoek na Zayyaan se dood, asook die omstandighede rakende die ander kinders se sterftes, instel.

Die egpaar sê ook hulle sal regstappe oorweeg as die RGB nie binnekort optree nie.

Dr. Anchen Laubscher, Netcare se groep- mediese direkteur, het gesê Beale se opnamevoorregte is op 12 Oktober opgeskort en Munshi sʼn vyf dae later.

“Netcare het besluit om die voorregte op te skort hangende ʼn hersiening van die omstandighede rondom ʼn pasiënt se dood,” het sy gesê.

Laubscher wou nie kommentaar lewer oor moontlike regstappe teen die twee nie.

In ʼn brief aan die Sayeds het Netcare gesê hy neem kennis van hul skrywe aan die RGB en dat die hospitaalgroep reeds die RGB van sy stappe (teen Beale en Munshi) in kennis gestel het.

“Ons lewer nie kommentaar op die kundigheid en professionaliteit van mediese praktisyns nie, synde hulle onafhanklike praktisyns is wat nie vir Netcare werk nie.”

Die RGB het nie op Maroela Media se navrae gereageer nie.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

20 Kommentare

jongste oudste gewildste
Mariaan

O nee dis skokkend…maak mens bang…dokters kom letterlik met moord weg….so jammer vir hierdie kind wat sy lewe aan hul toevertrou het….en al die verdriet nou vur die ouers…hoop die saak word deeglik ondersoek

Johanna

Sterkte aan hierdie ouers. dis baie hartseer en dit maak n mens so bang vir hospitaal toe gaan!!

Lau

My innige simpatie aan die ouers. Kan wil myself nie eers voorstel wat julle moet deurgaan nie. Mag daar antwoorde gevind word op julle vrae en mag die waarheid aan die lig kom.

Nettie

Ja, Lee? En as al die privaatdokters en -spesialiste nou – veral ná instelling van die NGV-plan – SA verlaat, waar gaan jý mediese hulp kry in geval van nood of sommer net gewoonweg siek-word?

Anoniem

Dis hoekom ‘n mens jou eie navorsing moet doen voor jy ‘n dokter kies. Daar is dokters en dokters. Het self vroeer die jaar hierdie operasie laat doen, en dit was ‘n reuse sukses. Was ook baie benoud vooraf. Het ‘n goeie dokter gekies. Moes maande en maande wag vir ‘n afspraak. Was oor en oor die moeite werd.