Ouers kry skoknuus: Dokters kan ‘niks meer vir Giovanni doen’

Giovanni Hendriks in Maart in die hospitaal. (Foto: Verskaf)

Net meer as tien dae nadat Giovanni Hendriks (18) van Pretoria veronderstel was om ná maande in die hospitaal eindelik ontslaan te word, het dokters Donderdag aan sy ouers gesê dat medici niks meer vir hul tienerseun kan doen nie.

Giani en Elize Hendriks, Giovanni se ouers, het aan Maroela Media gesê Giovanni se dokter het vanoggend die hartverskeurende nuus gedeel dat daar net te veel skade aangerig is toe Giovanni verlede week aan kos in die Kalafong-hospitaal verstik het.

Maroela Media het vroeër berig weens die hoesery het van die kos in sy lugweg en daarna longe beland. Dit het daartoe gelei dat sy hart gaan staan het. Giovanni kon genadiglik bygebring word, maar sy brein het ná die voorval begin swel.

Volgens Giani het die swelling op sy seun se brein vandeesweek al erger geword en sy hartklop bly ʼn bekommernis.

Giovanni is steeds afhanklik van die ventilator waaraan hy verlede week gekoppel is. Hy word tans met behulp van pynmedikasie onder verdowing in die hospitaal se waakeenheid gehou. “Hulle sê hulle kan hom nie meer help nie. Daar is te veel skade en hy ly te veel.”

Die ouerpaar weier egter om dié nuus te aanvaar. “Ons ken ons kind. Ons gaan aanhou waar [die dokters] ophou. Hulle sal die wonderwerk aanskou. God sal aangaan waar hulle ophou.”

Giovanni Hendriks (Foto: Verskaf)

Volgens Giani is dit nie blote toeval dat Giovanni weer bygebring kon word ná die gehoesery nie. “God sou hom nie wegvat en weer terugbring sodat hy net 11 dae later kan doodgaan nie.”

Die egpaar glo daar is vordering in Giovanni se toestand al is dit hoe gering.

Giovanni is in Maart in die hospitaal opgeneem nadat hy aanvanklik oor ʼn seer keel gekla het, en toe ʼn uur later glad nie meer kon beweeg nie. Hy is met Guillain-Barré-sindroom gediagnoseer, die tweede keer in sy lewe dat hy dié sindroom opdoen. Die eerste keer was agt jaar gelede en hy het destyds ten volle herstel.

Hendriks sê hoewel Giovanni se herstelpad dié keer veel langer was, het hy ook tot onlangs merkwaardige verbetering getoon. Waar hy aanvanklik heeltemal verlam was toe hy in die hospitaal opgeneem is, kon hy voor die jongste terugslag al alles behalwe sy hande en voete beweeg.

Lees alle vorige berigte oor Giovanni Hendriks op Maroela Media.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

39 Kommentare

jongste oudste gewildste
Danel Casey

Ons bid saam!!! Ons roep saam lewe oor hom!!!! Ons glo saam!!! Ons hoop saam!!!! My Here is in beheer!!!!

Magda

GOD IS GROOT – AMEN

Yolanda

Glo en vertrou… God se tyd nie ons tyd nie.. My ma se altyd daar is geen een in hierdie wereld wat oor ons tyd kan besluit nie net God… Seun jy en jou familie is in my gebede

Anoniem

As dit die Here se wil is, sal hy weer beter word.

Anni

Liewe ouers, Sterkte en bid vir Krag van bo