Ouers van mishandelde baba eindelik vas

Die polisiestasie in Pretoria waar AfriForum die dokters en maatskaplike werker gaan bystaan het. (Foto: Verskaf)

Die polisie het Woensdag die ouers van ’n ses maande oue babadogtertjie in hegtenis geneem op strafregtelike klagte van poging tot moord, aanranding met die doel om ernstig te beseer en kindermishandeling. Dít nadat die saak reeds maande lank sloer en AfriForum se privaat vervolgingseenheid moes ingryp.

Maroela Media het vroeër berig AfriForum se privaat vervolgingseenheid het op 24 Julie twee dokters en ’n maatskaplike werker by ’n polisiestasie in Pretoria bygestaan om ’n klag van kindermishandeling teen die ouers in te dien. Die dokters het reeds in April ’n klag van kindermishandeling teen die ouers by die polisie ingedien, toe die baba slegs vyf weke oud was. Die polisie het die saak aanvanklik ondersoek, maar het die klaers ingelig dat die saak gesluit is weens ’n gebrek aan bewyse.

Die privaat vervolgingseenheid het op 28 Julie skrywes aan die departement van maatskaplike ontwikkeling en die polisie gerig waarin geëis word dat die beweerde mishandeling van die baba onmiddellik aandag moet geniet om verdere trauma vir die slagoffer te voorkom.

Die aanvanklike polisie-ondersoek het niks opgelewer nie en die saak is van bakboord na stuurboord gestuur.

Andrew Leask, hoofondersoeker by AfriForum se privaat vervolgingseenheid, verwelkom die inhegtenisneming.

“Dit is egter betreurenswaardig dat die stelsel hierdie weerlose kind in die eerste plek in die steek gelaat en vroeër vanjaar toegelaat het dat sy in ’n lewensbedreigende omgewing teruggeplaas word. Die privaat vervolgingseenheid sal die saak bly dophou om te verseker dat die baba die nodige beskerming kry en die skuldiges aan die pen ry.”

AfriForum het vroeër gesê die babadogtertjie is in April in ’n hospitaal in Pretoria opgeneem met beserings wat met kindermishandeling ooreenstem. Die baba se ribbes was na bewering op 15 plekke gebreek.

Haar dokters en ’n private maatskaplike werker het toe ’n saak by die polisie en die departement van maatskaplike ontwikkeling aanhangig gemaak en aanbeveel dat die baba uit haar ouers se sorg verwyder word.

Hoewel die ouers in die hof verskyn het, is die aanklag teen die pa teruggetrek weens ’n skynbare gebrek aan getuienis. Die polisie het die dossier toe sonder verdere ondersoek gesluit. Die baba is in daardie tyd tydelik in haar ouma se sorg geplaas, maar daarna aan haar ouers terugbesorg.

Die baba is op 1 Julie weer met longontsteking, skok en dehidrasie in die hospitaal opgeneem. Sy was onder die gewigmylpaal vir haar ouderdom, asook rasend honger toe sy opgeneem is. Verdere toetse het getoon dat haar sleutelbeen twee tot drie weke vóór haar opname ’n fraktuur opgedoen het.