Ouers vies oor naamsverandering van skool

Die Hoërskool DF Malan in Kaapstad. (Foto: Hoërskool DF Malan-webblad)

’n Nuwe, meer insluitende naam wink dalk binnekort vir die Hoërskool DF Malan in Kaapstad.

Hoewel daar nog nie op ’n nuwe naam besluit is nie, het talle lede van die skoolgemeenskap reeds te kenne gegee dat hulle nié ten gunste is van die verandering van dié skool, wat in 1957 geopen is, se naam nie. Dié ouers en oudleerders meen ’n naamsverandering sal uiteindelik aanleiding gee tot ’n verval van die skool se Christelike etos en diskriminasie teen Afrikaanse, Christelike leerders teweeg bring.

Die skool se beheerliggaam het die proses enkele maande gelede van stapel gestuur en sê daar is in oorlegpleging met lede van die skoolgemeenskap, wat leerders, onderwysers, ouers en alumni insluit, besluit om sekere aspekte van die skool se simboliek te hersien.

Volgens André Roux, beheerliggaamvoorsitter, is dié gesprekke in “goeie gees” gehou, met drie dinge wat duidelik uitgestaan het.

“Ons skoolgemeenskap is dit eens dat ons ’n skool is wat Afrikaans en moedertaalonderrig hoog op prys stel op ’n manier wat alle Afrikaanssprekendes in die gemeenskap dien, terwyl dit ook die meertalige vermoëns van ons leerders bevorder op ’n manier wat hulle in staat stel om in ’n multikulturele wêreld sukses te behaal.”

Roux sê voorts dat die hoërskool die tradisionele grense van die Afrikaanse gemeenskap wil deurbreek deur ’n insluitende skoolgemeenskap te wees waar alle Afrikaanssprekendes ewe welkom voel.

“Ons is ook ’n skool wat die Christelike etos van die gemeenskap erken en ondersteun terwyl ons leerders en ouers met ander godsdienstige oortuigings respekteer en insluit.”

Roux sê die skoolgemeenskap het aangedui dat hulle graag die skool se etos en identiteit wil uitbou en op maniere uitbeeld wat die gemeenskap kan inspireer en waarmee hulle beter kan identifiseer.

Verskeie oudleerders en ouers skop egter volstrek teen dié verandering vas en twee Facebook-groepe, “Behou DF Malan se naam” en “Trots DF Malan”, is vir dié doeleindes gestig.

Die groepe het gesamentlik meer as 1 000 ondersteuners.

Bern Rautenbach, ’n oudleerder en ouer van die skool, meen dat ’n naamsverandering net die oortjies van die seekoei is.

“Dié soort ding begin altyd met goeie bedoelings en mooi beloftes, maar ontaard baie gou in ’n volskaalse transformasie-agenda.

“Eers die naam, dan die wapen, dan die leuse, dan die skoollied en langs die pad val die Christelike etos weg. Alles onder die vaandel van inklusiwiteit, maar eintlik beteken dit daar word teen sekere kultuurgroepe gediskrimineer en vryheid van spraak word onderdruk.

“Die val van Afrikaans sal ook eindelik volg, asook openlike diskriminasie teen Afrikaanse Christenkinders terwyl standaarde en dissipline in duie stort,” sê Rautenbach.

Hy meen dat daar net met sowat 150 mense oor die naamsverandering oorleg gepleeg is, terwyl duisende die naam sal wil behou. Boonop, sê Rautenbach, was ’n naamsverandering aanvanklik nie eens ter sprake nie, maar bloot gesprekke oor die skool se toekomsvisie.

“Dit het nie gegaan oor die verandering van die skool se naam nie, maar oor die skool waaroor ons droom. Toe ons egter ons oë uitvee, verskyn die voorsitter in die media en maak die uitlating dat daar besluit is die naam moet verander.

“Al wat ons sê, is dat daar op ’n demokratiese wyse oor die naamsverandering besluit moet word.”

Roux sê die beheerliggaam is bewus dat ’n naamsverandering ongemaklikheid by sommige mense kan skep, maar dat hulle die proses as ’n “opwindende geleentheid” beskou.

“Terwyl ons erken dat dit ’n sekere mate van onrustigheid by die skoolgemeenskap kan meebring en by sommige selfs ’n krapperige gevoel kan laat, beskou ons dit eerder as ’n opwindende geleentheid om voort te bou op ons skool se sukses.

“Dít op ’n manier wat sal verhoed dat ons aandag voortdurend afgetrek word deur kwessies wat uiteindelik bitter min te doen het met die uitnemende onderwys waarvoor ons skool tereg deur die hele land bekend is.”

Dit is nie in dié stadium duidelik wanneer die proses afgehandel sal wees nie. Daar is ook nog nie voorstelle vir ’n nuwe naam nie.

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

31 Kommentare

jongste oudste gewildste
Chris dupreez

Hoeveel van daardie mense weet wie DF Malan was. As mens oor n skool praat dan dink jy aan die skool nie aan sy naam of waar kom die naam vandaan nie. Die naam is n bysaak. Net so as jy van n persoon praat. Dit gaan oor die persoon of dan die skool en sy prestasies wat jy onthou , nie die naam nie. So los die skool se naam. Ten minste word daar nog Christelikheid aan gekoppel.

SjN

Bou jul eie en vernoem dit nat wat jul goed dinkl, los die bestaandes wat in elk geval verval onder jul beheer.

RS

Die skool raak al meer berug vir die verkeerde redes.

marius

Bern is heeltemal reg . Stuk vir stuk word alles afgebreek , en niemand doen iets daaraan nie . Elke ding wat Afrikaners as deel van hul lewenswyse beskou moet vernietig word . Roux is van die pad af . Dis die waarheid .

Elize

Dis so asof hulle dink dat naamsverandering die verandering sal meebring waarna hulle smag. Naamsverandering dui nie op verandering nie maar name word eerder gekoppel aan waarvoor daardie persoon gelewe of na gestrewe het.