(Argieffoto: Josh Hild/Pexels)
ʼn 35-jarige man van die Oos-Kaap is Donderdag gevonnis in verband met die verkragting van sy agtjarige dogter.
Anelisa Ngcakani, woordvoerder van die nasionale vervolgingsgesag, sê die meisie het haar pa op 19 Desember 2020 in Phakamisa, suidoos van King William’s Town, besoek en oorgeslaap. “Sy het in die middel van die nag wakker geword met haar pa wat op haar lê. Hy het haar verkrag en gedreig om nie enigiemand daarvan te vertel nie.”
Die meisie het die volgende dag na haar ma se huis, ook in Phakamisa, teruggekeer. “Sy het ʼn paar dae later vir haar tannie van die verkragting vertel toe lede van die familie gesien het sy loop moeilik. ʼn Mediese ondersoek het die verkragting bevestig.”
Ter verswaring van vonnisoplegging het adv. Vatiswa Jodwana-Blayi die getuienis gelei van die forensiese maatskaplike werker kapt. Ntombizandile Jiya en die meisie se tannie. “Hulle het getuig van die vertrouensband wat gebreek is omdat die meisie baie lief was vir haar pa en hom vertrou het.”
Die staat het ook aangevoer die pa het nie enige berou getoon vir wat hy gedoen het nie. Die staat het herhaaldelik daarop gewys dat daar nie enige rede is om af te wyk van die minimum vonnisoplegging nie.
Die hof het die pa gevolglik lewenslange tronkstraf opgelê.
Jammer hy kon nie meer as lewenslank kry nie
Mooi so. Hy moet ook nie parool kry nie.
Dit is laag dat n pa dit aan sy eie dogter doen so jammer doodstraf is nie meer in ons land nie
Skokkend, diere doen dit nie eers nie.
Siek ….
Daars hy, gooi sommer sleutel weg.