Pa, seun sterf in vliegongeluk

ʼn Man en sy seun is dood nadat ʼn ligte vliegtuig naby die R59 in Parys in die Vrystaat neergestort het.

Santi Steinmann, woordvoerder van Netcare 911, het gesê die vliegtuig het in ʼn veld neergestort. Volgens Steinmann is ʼn pa en sy vyfjarige seun in die ongeluk dood.

Chitra Bodasing, woordvoerder van ER24, het gesê die man is buite die vliegtuigwrak gevind en die kind binne die wrak. Hulle is op die toneel dood verklaar.

Geen verdere inligting is in die stadium beskikbaar nie. Die Burgerlugvaartowerheid ondersoek die ongeluk.