Pa skiet glo twee boerboele by familiekuier dood

Argieffoto

Argieffoto

Henrico Fourie, ʼn pa van Pretoria, het Maandag in die stad se landdroshof verskyn nadat hy glo Saterdag twee boerboele by ʼn familielid se huis in die weste van Pretoria doodgeskiet het nadat een van die honde glo sy seun gebyt het.

Kapt. Bonginkosi Msimango, polisiewoordvoerder, het Dinsdag aan Maroela Media gesê na wat verneem word, was Fourie (34) en sy gesin Saterdag by ʼn geleentheid by ʼn familielid se huis in Pretoria-Tuine toe die voorval plaasgevind het.

“Na wat verneem word, het die kind ewe skielik begin huil en gesê die honde het hom gebyt,” het Msimango gesê. Fourie het na bewering ʼn vuurwapen gegryp en albei boerboele doodgeskiet.

“Die kind se oupa het die polisie ontbied en Fourie, sy skoonseun, is in hegtenis geneem op aanklag van die afvuur van ʼn vuurwapen in ʼn woongebied asook opsetlike saakbeskadiging omdat hy glo die honde doodgeskiet het.”

Msimango het gesê die kind, vermoedelik in graad 2,  se wonde was glo van so ’n aard dat dit noodhulpbehandeling geverg het. Hy kon egter nie bevestig of die kind later in die hospitaal opgeneem moes word nie.

Korky Levanon, woordvoerder van die Tshwane-dierebeskermingsvereniging, het Dinsdag aan Maroela Media gesê die inspekteur wat Saterdag aan diens was, is deur ʼn klaer daarvan ingelig. “Die klaer het gesê die twee groot honde het glo nie gely nie,” het sy gesê.

Sy het gesê aangesien die diere glo nie gely het nie en die polisie die saak ondersoek, gaan die DBV nie ook ʼn ondersoek van stapel stuur nie. “As ander inligting intussen vorendag kom, sal ons optree indien nodig.”

Msimango kon nie dadelik bekend maak wat Maandag in die hof gebeur het nie, aangesien die dossier nog nie terug is by die Hercules-polisiestasie nie.

Fourie het aan Maroela Media gesê hy het “niks om weg te steek nie”. Hy het gesê hy is óók aangeval, maar is besig om ‘n verklaring oor die voorval saam te stel en sal binnekort kommentaar lewer.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

67 Kommentare

jongste oudste gewildste
Leoni

Is daar ooit vir die seun gevra wat het hy gedoen sodat die hond sou reageer het
om te byt. Mense is te vinnig om net te se dis die hond se skuld.

Bruno Stef

Die ou is maar lekker “trigger happy” Ek waarsku my eie kleinkinders altyd om nie my twee Staffies te terg as hulle ons besoek nie en so ook mense wat die honde wil vryf as ons met die honde gaan stap.Honde is altyd onvoorspelbaar en lojaal aan hulle eienaars en sal enige verkeerde beweging as n aanval beskou.

Eliza-beth

Soms moet mens familie liefs een maal per jaar op ‘n negatief in die donker sien… Net my gevoelente.

t.prinsloo

Hoekom altyd honde skiet as die ouers nie hul kinders vroeg al leer hoe om honde met respek te behandel nie! Sy vuurwapen moet weg gevat word, hy is defnitief nie bevoeg om n vuurwapen te besit nie, more skiet hy dalk jou kind!!! Hoekom het die hond hom gebyt? Daar moet n rede wees… was hond besig om te eet? Het hy hond se stert getrek of sy ore, of hom geskop? Het hy die hond getart? Hoekom al2 skiet? Innige meegevoel aan die honde se eienaars!

Karla

Ek was ongeveer 16, ek het kruisbeen op die gras gesit saam met vriendinne, hulle vriendelike onskadelike hond het skielik sonder ENIGE rede na my toe gekom en na my gesig gebyt! As ek nie my kop betyds weg geruk het nie, was daar dalk lelike skade!