Pa sterf ná jacuzzi-fratsongeluk

Ilse-Marie en André van Huyssteen by hul seuns, Dwayne en Dandré. Foto: Verskaf

Die man van Krugersdorp in Gauteng wat byna drie maande gelede ernstige beserings opgedoen het nadat ʼn jacuzzi ontplof het, is Dinsdagaand oorlede.

André van Huyssteen (30) is net na 19:00 in die waakeenheid van die Steve Biko-hospitaal in Pretoria oorlede nadat hy sepsis en ’n infeksie in die hospitaal opgedoen het.

Ilse-Marie van Huyssteen, André se vrou, het Woensdagmiddag aan Maroela Media gesê André was reeds onder verdowing uitgebring en by sy volle bewussyn, toe hy sowat twee weke gelede ’n terugslag beleef het.

Volgens Ilse-Marie het hy skielik weer aan die slaap begin raak en dit is toe dat dokters onraad vermoed het. “Hulle het bloed getrek en agtergekom daar is groot moeilikheid.”

Die sepsis en infeksie het André se organe aangetas waarna “sy hele liggaam ingegee het. Ek dink persoonlik sy longe het platgeval,” sê sy.

’n Emosionele Ilse-Marie verduidelik dat die afgelope drie maande wat André in die hospitaal was verskriklik uitmergelend was.

André van Huyssteen in die hospitaal. Foto: Facebook

Maroela Media het vroeër berig die Van Huyssteen-egpaar het op 8 Augustus by vriende in Pretoria gebraai en in hul jacuzzi ontspan. “Ek het die huis ingegaan toe ek ewe skielik ʼn groot slag hoor. Druk het opgebou en die boiler laat ontplof,” het Ilse-Marie destyds verduidelik.

ʼn Stuk hout van die dek om die jacuzzi het André teen die kop getref en só diep binnegedring dat dit eers die volgende dag tydens ʼn operasie in die Steve Biko-hospitaal verwyder kon word.

Terwyl hy in die waakeenheid gehou is, moes ʼn tweede operasie uitgevoer word om sy breinvlies te heg. Later is hy ʼn derde keer geopereer nadat die wonde van die ongeluk oopgetrek het. ʼn Vierde operasie is later gedoen om vog van sy brein te verwyder.

André word oorleef deur sy vrou en twee kinders, Dwayne (9) en Dandré (3).

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

50 Kommentare

jongste oudste gewildste
Ek

RIV, Soveel mense sterf in Steve Biko asgv infeksie na die tyd , my pa is ook daar oorlede twee weke na sy operasie. :-(

ANDRE

Jy is BAIE gelukkig as jy uit n staatshospitaal kan kom sonder n kwaal of n ding wat jy daar opgetel het. Daai plekke is n gillerige besigheid….. jy wil gil vandat jy daar in stap tot jy daar uitstap.

Ben

@Andre – Ja en dan wil die ANC ‘n National Health System implementeer. Dan gaan ons almal dood aan een of ander kwaal. Dit is tragiese dat die man dood is aan ‘n Boiler wat ontplof. Wat van die veiligheids klep?

yolanda

klink na vuil en vol kiem hospital,, hoekom sterf mense paar dae na operasie van dieselfde probleem,,,,,,iemand moet daai plek gaan ontkiem en uitspuit

Willie

Ai man dis tragies…

Maar ja steve biko hospitaal, en wel basies alle ander staats hospitale is in so toestand mens kan maar weet jy waag jou lewe om daar te gaan lê. Die Drs is baie goed maar die nasorg maw verpleegdiens is PATETIES ! Kyk ek sal ophou drink en minder eet maar my mediese fonds betaal ek ten alle koste !