Pa vas wat melk koop: Polisie se optrede ‘skokkend’

Argieffoto (Foto: SAPD, Facebook)

Die onlangse inhegtenisneming en aanhouding van ’n Centurion-pa wat gedurende die aandkloktydperk formulemelk vir sy pasgebore baba gaan koop het, was onregmatig en skokkend.

Só sê strafregkenner Llewellyn Curlewis.

Maroela Media het vroeër berig die ouerpaar het Vrydag in die vroeë oggendure met hul baba se voeding gesukkel. Die man het hom toe na die hospitaal, waar die baba enkele dae vantevore gebore is, gehaas om formulemelk by die apteek in die hospitaal te gaan koop. Die apteek is 24 uur oop.

Die man is egter by sy terugkeer nie ver van die egpaar se huis in Wierdapark nie deur polisiebeamptes voorgekeer omdat hy die aandklokreël verontagsaam het. Die man het die melk asook die betaalstrokie aan die polisiebeamptes gewys, maar is nietemin in hegtenis geneem.

Curlewis sê dit is skokkend dat polisiebeamptes nie die pa se rede om buite sy huis gedurende die aandklokreël te wees, kon insien nie. “Die voorval geld ongetwyfeld as onregmatige inhegtenisneming en aanhouding. Selfs al het die president nie gesê dat mense vir noodgevalle die aanklokreël mag oortree nie, bepaal die wet dat hierdie voorval as ’n noodtoestand geld.

“Dit is geldige verweer. ’n Noodtoestand is nog altyd geldige verweer. Dis so goed soos selfverdediging.”

Curlewis verduidelik dat geen hof dus die pa skuldig sal bevind aan die oortreding van die Wet op Rampbestuur nie. Daar is wel voldoende gronde vir die pa om ’n siviele eis teen die SAPD in te stel aangesien dit blyk dat polisiebeamptes “onkundig” en nie opgelei is om te onderskei tussen misdaad en geldige verweer nie, sê hy.

“Dit is skreiend.”

Curlewis wys verder daarop dat die baba se lewe heel moontlik in gevaar gestel is aangesien die pa verhoed is om die melk vir sy vrou te neem. Dié aspek sal natuurlik ook in ’n siviele eis ter sprake kom.

Die drukgroep Action Society het intussen gesê die versorging van babas, kinders, bejaardes en ander weerlose mense gedurende die tweede golf Covid-19-infeksies behoort voorkeur te kry.

Die groep meen die afsonderingsregulasies ontaard in ’n magspel en eis dat daar teen die betrokke polisiebeamptes opgetree word.

Daleen Gouws, woordvoerder van Action Society, sê die drukgroep veroordeel die voorval ten sterkste. “Hierdie optrede deur lede van die SAPD is onaanvaarbaar en moet reggestel word.

“Ons hospitale is onder geweldige druk, dus word pasgebore babas feitlik onmiddellik ontslaan. Die regering en die departement van sosiale ontwikkeling sal dringend om ’n tafel moet sit om kwesbare partye se behoeftes aan te raak. Gesondheidsdienste behoort te alle tye vir noodgevalle beskikbaar te wees, ongeag die Covid-19-situasie,” sê Gouws.

Curlewis vertel dat verskeie Suid-Afrikaners waarskynlik al onregmatig gedurende die afsonderingstydperk in hegtenis geneem is, net om later vrygelaat te word en nooit aangekla te word of in ’n hof te verskyn nie. Hulle meld waarskynlik ook nie die betrokke gevalle aan nie, uit vrees dat die saak weer na vore gaan kom.

“Ek dink die een of twee gevalle waarvan ons weet, is ’n druppel in die emmer.”

Die polisie het vroeër gesê ’n dringende interne ondersoek na die voorval word gelas.

Die betrokke polisiewoordvoerder kon nie Dinsdag vir kommentaar bereik word nie.

Lily Rautenbach, die pa se prokureur, het Dinsdag aan Maroela Media gesê hy sal binnekort in ’n hof verskyn. Rautenbach het vroeër reeds bevestig dat die ouerpaar regstappe oorweeg.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

45 Kommentare

jongste oudste gewildste
RS

Gaan nie oor dat hulle nie op gelei is nie. Hulle weet goed wat is reg en verkeerd. Dis n arrogansie houding.

Chantel

Ek sou ook regstappe gevat het. Soms het mens net bietjie logika nodig, maar, nou weer, jy word nie daarmee gebore nie!!

Persheks Adri

Dagvaar hulle vir elke sent! Die polisie is magsbehep pffft en kan nie eers onderskei tussen noodsaaklikhede nie. Almal moet net toe gesluit word vir snert

Elize

En hulle kon nie daaraan dink om die melk vir die ma te gaan gee en haar in te lig oor haar man nie?

Kokerboom

Alles gaan oor die kwaliteit van mense wat aangestel word. Die word “diskresie” is ‘n baie moeilike konsep vir baie om te verstaan, wat nog van toepas!