‘Padwoede’ eis pa en seun toe taxibestuurder glo skiet

Danie en André Duvenhage (Foto: Facebook)

’n Taxibestuurder het Vrydag glo ’n pa en seun van Limpopo by ’n vulstasie in die omgewing van Louis Trichardt (Makhado) doodgeskiet ná ’n beweerde voorval van padwoede op die N1.

Danie Duvenhage (29) is op die toneel dood, terwyl sy pa, André (52), met sy aankoms by ’n hospitaal in Louis Trichardt aan sy wonde beswyk het.

Die taxibestuurder (33) is tans onder polisiebewaking in ’n hospitaal nadat hy homself glo tydens die voorval raakgeskiet het.

Brig. Motlafela Mojapelo, provinsiale polisiewoordvoerder, sê die skietery by die vulstasie spruit uit ’n voorval wat vroeër op die N1 vanaf Louis Trichardt se rigting na Polokwane plaasgevind het.

Mojapelo het nie die presiese omstandighede rakende die voorval van padwoede bekend gemaak nie, maar wel gesê die taxibestuurder is ná die voorval na die vulstasie by Bandelierkop. André en Danie het glo die taxibestuurder tot by die vulstasie gevolg.

“Die taxibestuurder het ’n vuurwapen te voorskyn gebring en die pa en sy seun doodgeskiet.”

Die taxibestuurder het glo ’n gelisensieerde vuurwapen gebruik en dit is intussen vir ballistiese toetse gestuur.

Twee aanklagte van moord word ondersoek.

Lt.genl. Thembi Hadebe, die provinsiale polisiekommissaris in Limpopo, het intussen die voorval veroordeel en ’n volledige ondersoek gelas na die vuurwapen wat gebruik is, die eienaar van die vuurwapen en die omstandighede wat tot die skietery gelei het.

Ook Marcelle Maritz, leier van die VF Plus in Limpopo en lid van die provinsiale portefeuljekomitee oor polisie, het versoek dat ’n deeglike ondersoek na die voorval geskied.

Maritz het die voorval as skokkend bestempel en gesê voorvalle van die aard kan nie op openbare paaie geduld word nie.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

42 Kommentare

jongste oudste gewildste
melaney

Skokkend maar absoluut te verwagte. Dit is nou hulle land. Innige simpatie aan familie en vriende.

Onnie

Skokkend!

JB

Hier is n duidelike bewys dat die vuurwapen wet op self verdediging nie verander kan word. Want mense moet hulle self kan verdedig.

Samuel

Skokkend!! Ek kan net hoop dat geregtigheid sal seëvier. Innige simpatie aan die naasbestaandes.

Jaco

Gelisensieerd aan wie??