Paia-aansoek oor raskwotas by mediese skole

Die Universiteit van Kaapstad. (Foto: https://www.news.uct.ac.za)

Die Demokratiese Alliansie (DA) het Donderdag ’n formele aansoek ingevolge die Wet op die Bevordering van Toegang tot Inligting (Paia) ingedien om die 13 Suid-Afrikaanse mediese skole se toelatingsvereistes spesifiek rakende ras vas te stel.

Dit volg op die bedanking van dr. Angelique Coetzee as voorsitter van die Suid-Afrikaanse Mediese Vereniging (SAMV) ná haar opmerkings teenoor ’n radiostasie oor toelatingsvereistes by mediese skole. Sy het onder meer gesê die proses is hoogs verpolitiseer en dat mediese fakulteite raskwotas vir voornemende mediese studente het.

Die Universiteit van Kaapstad se 2022-prospektus is ook onlangs onder die loep geneem oor die uitgebreide rasgebaseerde kriteria wat in sy toelatingsproses uiteengesit is.

“Daar is ’n desperate tekort aan mediese beroepslui in Suid-Afrika, en die DA is oortuig dat alle verdienstelike studente toegelaat moet word om medies te studeer, en dat geen student op die kleur van hul vel beoordeel moet word nie,” sê Chantel King, die DA se skaduminister van hoër onderwys.

Die DA se aansoek aan Paia beoog om die volgende vas te stel:

  • Die huidige toelatingsvereistes vir nuwe studente tot ’n MBChB-graad.
  • Of bevestiging van aansoekers se rasse-identiteit as maatstaf vir toelating gebruik word, en indien wel, ’n presiese beskrywing van die wyse waarop dit toegepas word.
  • Of bevestiging van verskillende toelatingskriteria of -drempels geld vir aansoekers van verskillende “rassegroepe”.
  • Die kriteria en fisieke eienskappe waarop staatgemaak word om individuele aansoekers op rassegrondslag te klassifiseer.
  • Die kriteria en fisieke eienskappe waarop gesteun word om te bepaal of ’n aansoeker se “rasse-selfklassifikasie akkuraat” is.
  • Die aantal aansoekers wie se aansoeke vir die 2021-inname afgekeur is op grond daarvan dat hulle nie klassifiseer om aan voorkeur- “aangewese groepe” te behoort nie en wat andersins toegelaat sou word as hulle geklassifiseer is as behorende tot ’n voorkeur- “aangewese groep”.

Die DA se Paia-aansoeke is ingedien by die Universiteit van Kaapstad, Universiteit van Witwatersrand, Universiteit Stellenbosch, Universiteit van KwaZulu-Natal, Universiteit van Pretoria, Sefako Makgatho Gesondheidswetenskappe-Universiteit, Universiteit van die Vrystaat, Universiteit van Limpopo, Walter Sisulu-Universiteit, Universiteit van Johannesburg, Universiteit van Wes-Kaapland, Noordwes-Universiteit en Nelson Mandela Metropolitaanse Universiteit.

“Die land se gesondheidstelsels is onder enorme druk, en om waardige kandidate te verhinder om die mediese beroep te betree is nie net ’n onreg aan daardie individue nie, maar benadeel ook die lede van die publiek, insluitend die armes en kwesbaarste mense.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

23 Kommentare

jongste oudste gewildste
Diline

Dis reg! Laat hulle nou met die hele sak patats vorendag kom, dink mos als kan verewig weggesteek word sonder dat mense die waarheid uitvind nie. As dit WEL die geval is dat jy gekeur word weens jou kleur moet hierdie spul hof toe gesleep word, punt! Ons blankes raak nou moeg vir die rasmal spul want dink hulle kan alles beheer, REGTE KOMMUNISTE

Marius

Die mense wat die minste bygedra het tot al die opvoedkundige instellings, van laer skole tot universiteits instellings, het nou meeste sê oor die instellings en is op pad om dit te vernietig. Dit is maklik om iets af te breek as jy dit verniet gekry het.

casper

Die spul twak is al meer ‘n dekade aan die gang –
Wit dogters met 6 onderskeidings HG word weg gewys en swart kinders met net 2 onderkeidings word toelaating gegee.
Dit was al in 2012 die geval by UP.

Jakes

Dit is n skreiende skande dat hierdie praktyke toegepas word terwyl die standaard van mediese sorg al lankal veragter het veral in staatshospitale. Omgekeerde rassisme word sedert 1994 deel van die huidige ANC regime se beleid en word wyd en suid toegepas op vele gebiede.

Heindrich

Vat so!