Pakkie-monopolie vir Poskantoor ‘rampspoedig’

Die Poskantoor wil alleenreg op die aflewering van pakkies minder as 1 kg hê. (Argieffoto)

Indien die Suid-Afrikaanse Poskantoor (Sapo) in sy voortslepende hofgeding slaag om ’n monopolie op die aflewering van pakkies wat minder as een kilogram weeg te bekom, sal die uitwerking daarvan op private koeriers en e-handelondernemings rampspoedig wees.

Só sê Peter Harvey, besturende direkteur van die betalingsdiensverskaffer DPO Suid-Afrika, wat ondernemings soos Takealot en Mr. Delivery bedien.

Sapo het in 2018 gesê dat die private koeriermaatskappy PostNet strydig optree met die Poswet wat bepaal dat die poskantoor die alleenreg het op die aflewering van pakkies van 1 kg of minder. Die Onafhanklike Kommunikasieowerheid (Okosa) se klagte- en nakomingskomitee het bevind dat PostNet inderdaad dié wet oortree en sy aflewering van pakkies onder 1 kg teen Maart verlede jaar moet staak.

PostNet en die Suid-Afrikaanse Spoedposvereniging (SAEOA) het in die hooggeregshof teen dié uitspraak geappelleer. Die saak sal na verwagting eers volgende jaar aangehoor word.

“Daar is ’n goeie argument vir ’n sterk, goed gefinansierde en doeltreffende poskantoor. Die private sektor moet egter toegelaat word om die gaping in die afwesigheid daarvan te vul,” sê Harvey.

Maroela Media het vroeër berig dat die poskantoor wéér op die rand van ineenstorting was en deur bankrotskap in die gesig gestaar is ondanks die R8 miljard se reddingsboeie wat hy sedert 2014 ontvang het. Die poskantoor is ook oor die afgelope jare gereeld onder skoot weens vertragings met aflewerings of posstukke wat nooit hul bestemming bereik nie.

“Gegewe die operasionele probleme wat die poskantoor ondervind, sal beperkings op private koeriers ’n baie negatiewe uitwerking op die plaaslike logistieke sowel as e-handelsektor hê,” sê Harvey.

“Ons werk saam met duisende e-handelmaatskappye, waarvan baie kleinsakeondernemings is, wat tydens die Covid-19-inperking op die been gebring is. Dié ondernemings ding reeds mee met groter en selfs internasionale maatskappye en maak staat op hul koeriervennote vir vinnige, betroubare aflewerings.”

Harvey sê voorts dat sodanige beperkings werkloosheid negatief sal beïnvloed en dat die regering eerder hard daaraan moet werk om die poskantoor te verbeter en hulle toelaat om met die private sektor mee te ding.

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

39 Kommentare

jongste oudste gewildste
Marius

Koerier net ‘n baksteen saam….

Gerhardus

Geen probleem. Maak net seker jou pakkie weeg nét meer as 1 kg Ek betaal eerder ‘n rand-of-twee meer met die wete dat die pakkie wél spoedig by die ontvanger sal uitkom. Die poskantoor kan dit nie waarborg nie.

Drikus

Praat van irrasioneel, die een vat die “cherry” op die koek. Poskantoor kan nie sy huur betaal nie weens wanbesteding, en nou wil dit opmaak vir die swak gedrag deur kompetisie uit te sluit.
Poskantoor kan sy pad terugveg in die mark, deur goeie dienslewering en billike pryse. Almal het die poskantoor gebruik 20 jaar gelede, dit was die goedkoopste, en geregistreerde prioriteit pos het vinnig by sy bestemming uitgekom.

Vandag is daar soveel poskantore gesluit weens die on-betaalde huur, dat geen belangrike posstuk met die poskantoor gestuur kan word nie.

chrismar

Ek het iewers gelees of oor radio gehoor dat die Poskantoor besig is om hul afleweringsgedeelte aan Amazon te verkoop om hul uit die moeilikheid te kry.As dit so is maak dit sin en glo ek dit is druk wat Amazon op hulle plaas om die grootste moontlike markaandeel te kry.

Anya

Daar is bitter min instansies wat enige behoorlike diens lewer in ons land oor.
Die poskantoor is nie een van die min nie.
Daar is net geen einde aan absoluut absurde vootstelle in SA nie…
Wat het geword van ons eens mooie land ????