Panayiotou weer in hof

Christopher Panayiotou in die hof. Foto: ANA

Christopher Panayiotou in die hof. Foto: ANA

Werknemers van die OK Grocer in Algoapark het Dinsdag vir die eerste keer by die Port Elizabeth-landdroshof bymekaargekom om hul werkgewer, Christopher Panayiotou, wat tereg staan vir die moord op sy vrou, Jayde, te ondersteun.

ʼn Groep van vyf vroue geklee in blou T-hemde het voor die hof byeengekom en gesê hulle soek hul werkgewer terug by die werk. Panayiotou se naam het voor op hul hemde verskyn met die woord “onskuldig” agterop. “Is dit ʼn sonde om hier te wees? Ons soek ons baas terug,” het die vroue gesê.

Die saak teen Panayiotou en sy twee medebeskuldigdes, Sizwezakhe Vumazonke en Sinethemba Nenembe, is intussen tot 16 Mei uitgestel.

Ondersteuners van die groep Justice for Jayde sowel as lede van die DA se vrouenetwerk het ook voor die hof bymekaargekom.

Jayde, ʼn voormalige onderwyseres, is verlede jaar in April vermoor. Haar liggaam is buite die Kwanobuhle- informele nedersetting in Uitenhage in die Oos-Kaap gevind.

Die staat voer aan Nenembe het die vermeende huurmoordenaar Vumazonke bygestaan om Jayde te ontvoer en te vermoor op versoek van haar man.

Die hof het in Januarie gehoor Panayiotou se hofsaak sal na verwagting in Julie begin. Sy aansoek om borgtog is aanvanklik in die Port Elizabeth-landdros afgekeur, en weer in die hooggeregshof in Grahamstad toe hy appèl aangeteken het. Dit het vroeër aan die lig gekom dat Panayiotou se prokureurs weer ʼn aansoek om borgtog sou bring gegrond op nuwe feite, maar geen verdere besonderhede is intussen bekend gemaak nie.

Lees alle vorige berigte oor Christopher Panayiotou op Maroela Media.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

2 Kommentare

Ben Prinsloo ·

Net n wenk aan die groep wat hom terug by die werk wil hê: vra vir die hofpersoneel wat Annie Dewani se saak gedoen het en julle baas is vry. Maklik.

pop ·

Hopenlik sal julle nooit weer julle baas by die werk terugkry nie. Hy hoort in die tronk tot die dag wat hoenders tande groei.

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.