Paniek pak SA ná gerugte oor hernieude drankverbod

Talle Suid-Afrikaners het Dinsdag inderhaas paniekaankope by drankwinkels gedoen na ‘n gerug dat die verbod op alkoholverkope weer heringestel gaan word. (Foto: Maroela Media)

Talle Suid-Afrikaners was Dinsdag opnuut op hol nadat boodskappe – dat die verbod op drankverkope weer ingestel gaan word – soos ʼn veldbrand op sosialemediaplatforms versprei het.

In een van die boodskappe wat heen en weer rondgestuur word sê ene “Shawn on the news” drankwinkels sluit vanaand weer en dat pres. Cyril Ramaphosa die land om 20:00 gaan toespreek om dié aankondiging te doen.

In die stemboodskap word ʼn toename in padongelukke as een van die redes vir die sogenaamde hernieude verbod voorgehou.

Daar was blitsig ellelange toue voor drankwinkels nadat die gerug oor ‘n hernieude drankverbod versprei is. (Foto: Janie Monsieur/Maroela Media)

Die verbod op die verkoop van alkohol en tabakprodukte is verlede Dinsdag opgehef.

Die vorige keer wat die verbod weer ingestel is, het Ramaphosa die land op ʼn Sondagaand toegespreek nadat drankwinkels ingevolge die afsonderingsregulasies reeds die voorafgaande Donderdag gesluit is. Drankverkope is toe, nes nou, net tussen Maandag en Donderdag toegelaat.

Duisende mense wat nie vooraf ekstra drinkgoed aangekoop het om hul deur die verbod te sien nie, is deur die aankondiging onkant betrap. Hulle wou vandag oënskynlik nie weer dieselfde fout begaan nie.

Mense het Dinsdagmiddag in ellelange toue by winkels gestaan om drank te koop. By sommige drankwinkels was die rakke plek-plek reeds dolleeg terwyl paniekaankope inderhaas gedoen is.

Jackson Mthembu, minister in die presidensie, het ontken dat Ramaphosa die land vanaand gaan toespreek en het ook ontken dat die nasionale bevelsraad besluit het om drankverkope weer op te skort.

Baie mense wou nie kanse waag nie en het winkeltrollies volgelaai uit vrees dat die alkoholverbod weer ingestel gaan word. (Foto: Janie Monsieur/Maroela Media)

Sean Macpherson, die DA se woordvoerder oor handel en nywerheid, het ook gesê dat hy ʼn navraag oor die bewering by die departement van handel en nywerheid gedoen het en dat die gerug oor ʼn hernieude verbod in hierdie stadium onwaar is.

ʼn Boodskap van Macpherson hieroor het óók blitsig versprei. Maroela Media het by hom self bevestig dat hy wel dié boodskap aan die DA-koukus gestuur het.

Die Restaurantvereniging van Suid-Afrika (Rasa) het intussen ook in ʼn boodskap aan sy lede gesê hy het uit “betroubare bronne” verneem dat die gerugte oor die herinstelling van die verbod onwaar is.

“Ons doen ʼn beroep op almal om in hierdie tyd verantwoordelik op te tree en nie ongegronde gerugte te versprei wat blote paniek veroorsaak nie,” skryf Rasa.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

29 Kommentare

jongste oudste gewildste
Lana

ek wens die drank winkels wil hulle tye korter maak, ons is al so moeg vir dronk mense op die paaie, onskuldige mense gaan dood, gesins geweld vind orals plaas.

Antoinette

Dis so hartseer om te sien dat drank so ‘n belangrike rol in mense se lewens speel.

Aries

Hierdie ou wat eerste die boodskap versprei het moet n medalje kry. Eerstens het die bottestore binne ure begin opmaak vir soveel geld wat hulle verloor het.

Tweedens- dit wat kopdoek Zuma so hard voor baklei het is met n eenvoudige stemboodskap blitsvinnig van die tafel gegee. Haar asma pompie werk verseker nou oortyd

Cherokee

Die drankwinkels het vir redelik lank geen geld gemaak nie, en om nou so boodskap die wye weld in te stuur, kan dan die omset ‘n hupstoot gee. Om 4uur vanmiddag het ‘n Indiër kennis by my kantoor ingeloer en ook voorgestel dat ek voorraad aanskaf (‘omdat daar sprake is van weer toemaak’). Seker net iemand in die drankhandel wat ‘slim’ gedink het en die boodskap geloods het. Klink of dit werk:-)

Snowball

Daai prentjie is een wat geholpe is dié naweek – Pap en spier op die spyskaart. Ek verkies Pap en sous vir ‘n bykossie.