Paramedici met messe aangehou, beroof

Argieffoto: ER24

Argieffoto: ER24

Vier paramedici is Woensdag in twee afsonderlike voorvalle met messe aangehou.

Werner Vermaak, woordvoerder van ER24, het gesê twee paramedici het omstreeks 11:00 ʼn motor in die baan vir aankomende verkeer gesien ry naby Christiaan de Wet-rylaan in die weste van Johannesburg. “Die motor het oomblikke later in die ambulans vasgery. Lede van die publiek het by die toneel stilgehou en aangedui dat dieselfde motor ook teen verskeie ander motors gebots het.”

Volgens Vermaak het die paramedici die man in die motor genader om uit te vind of hy beseer is. “Die man het uit die motor geklim en ʼn mes uitgepluk. Die twee paramedici het teruggetree terwyl die man voortgegaan het om hulle te dreig. Die paramedici kon gelukkig daarin slaag om hulself te verdedig terwyl hulle op die polisie gewag het.”

Die polisie het kort hierna op die toneel opgedaag en die man in hegtenis geneem.

In ʼn afsonderlike voorval is paramedici van ER24 in Durban van hul persoonlike besittings beroof terwyl hulle na ʼn pasiënt in KwaMashu omgesien het. Volgens Vermaak het paramedici ʼn man behandel by ʼn dokter se spreekkamer vir borspyn. Een van die paramedici het die man in die ambulans gelaai terwyl die ander een die rolstoel na die spreekkamer teruggestoot het.

“Mense het begin skree dat die paramedikus buite aangerand word. ʼn Groep van ses jong mans het die sakke van die paramedikus se uniform oopgeskeur om by sy beursie uit te kom. Die mans het ook twee selfone uit die ambulans gesteel en die radiostelsel wat gebruik word om noodvoertuie te ontbied uitgeruk voordat hulle gevlug het.”

Volgens Vermaak het die paramedici voortgegaan om die pasiënt te behandel en na ʼn nabygeleë hospitaal te vervoer voordat hulle die voorval by ʼn plaaslike polisiestasie gaan aanmeld het.

Vermaak het gesê geen van die paramedici is tydens die voorvalle beseer nie.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

10 Kommentare

jongste oudste gewildste
Skapie

Dit is darem maar skokkend

Krisjan Fourie

Die tipping point is op ons. As die lewensredders aangeval word, moet ons onsself vergewis met wat die psige is waarmee ons werklik mee deal hier. Dis erger as politiek. Dis ‘n dier met ‘n honger kyk. Wat nou?

AmY

Nee! Dis Baie erg!

Irene

Buitelanders hier gesit om dit aan ons te doen

Doring

Dankie aan de Klerk en al die wat Ja gestem het.