Parool het vir Vicki Momberg gewink

Vicki Momberg Donderdag in die hof. Foto: ANA

Die staat het nie Vicki Momberg se aansoek om borgtog teengestaan nie, aangesien sy binnekort vir parool in aanmerking sou kom en nie as ʼn vlugrisiko beskou word nie.

Momberg is Donderdag in die streekhof in Randburg op borgtog van R2 000 vrygelaat hangende haar appèlaansoek.

Staatsaanklaer Yusuf Baba het gesê Momberg het reeds vier maande tronkstraf uitgedien en dat sy oor sowat twee maande vir parool in aanmerking sou kom.

Kingdom Onah, Momberg se prokureur, het met die aanvang van die verrigtinge versoek dat sy kliënt se boeie verwyder word.

Onah het aan die hof gesê Momberg is 49 jaar oud, was voorheen ʼn eiendomsagent en dat sy geen vorm van inkomste het nie en haar ouers pensioenarisse is. “Die verdediging het met haar familie en vriende gepraat en hulle kon daarin slaag om R2 000 bymekaar te maak.”

Momberg het gevra dat, indien daar voorwaardes aan haar borgtog sou wees, sy toegelaat sou word om na Durban te reis.

Landdros Pravina Raghoonandan het Momberg op borgtog van R2 000 vrygelaat hangende die uitkoms van haar appèlaansoek. Die saak is tot November uitgestel.

Momberg se aansoek om verlof tot appèl teen haar skuldigbevinding en vonnis het Maandag in die hooggeregshof in Randburg geslaag.

Momberg is vroeër tot drie jaar tronkstraf gevonnis, waarvan een jaar opgeskort is, nadat sy in November verlede jaar op vier aanklagte van crimen injuria skuldig bevind is ná sy ʼn swart polisiebeampte rassistiese beledigings toegesnou het.

Sy is in Februarie 2016 op video vasgevang waarin sy die polisiebeampte, wat haar gehelp het nadat sy die slagoffer van ʼn gryp-en-spaander-voorval was, die k-woord noem. Dit het tydens die verhoor aan die lig gekom dat Momberg dié woord 48 keer in die video gebruik het.

Sy het geskiedenis gemaak as die eerste persoon in Suid-Afrika wat tronk toe gestuur is vir rassisme.

In Junie verlede jaar het die gelykheidshof ook beslis dat Momberg R100 000 skadevergoeding aan konst. Clement Mkhondo moet betaal.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

31 Kommentare

jongste oudste gewildste
ES

Die enigste regverdigheid wat hier geskied het is die feit dat sy borgtog toegestaan is en dat sy mag reis. Niemand anders word vervolg oor rassisme nie, kry net ‘n raps op die vingers. Rassisme is verkeerd en geeneen moet hulself daaraan skuldig maak nie, maar op hierdie stadium is dit ‘n eenrigting straat en word net sekere mense vervolg.

moeg vir patete

JA sy was verkeerd maar daar is soveel erger dinge wat gebeur… Plaas bring hulle die doodstraf terug dan sal ons land ‘n baaaaaie beter plek wees

bollie

Hoekom kom sy so gou in aanmerking vir parool? Moet ‘n gevangene nie ten minste twee-derdes van die gevangenisstraf uitdien nie?

HPV

Persoonlik is ek nie bereid om die doodstraf se bestuur aan die regime oor te laat nie, hulle kon nie eers die land se rioolplase bestuur nie…

Rupert Ashford

Die skande bly nogsteeds dat sy ‘n SLAGOFFER VAN MISDAAD was en moontlik in ‘n staat van trauma was toe “misdaad” gepleeg is. Wonder hoe vorder die polisie se ondersoek na die rooftog of het dit gestop na die “stop” knoppie gedruk is nadat sy opgeneem is?