Parys-boere: Hof hoor oor oorledenes se beserings

Van links is Cor Loggenberg (20), Loedie van der Westhuizen (19) en Miela Janse van Vuuren (23). Foto: Mariné Lourens

Die verhoor van die ses mans van Parys wat aangekla word van die moord op twee beweerde plaasaanvallers is Vrydag in die hooggeregshof voortgesit.

Boeta van der Westhuizen (46), sy seun Loedie van der Westhuizen (19), Anton Loggenberg (50), sy seun Cor Loggenberg (20), Miela Janse van Vuuren (23) en kapt. Henk Prinsloo (47) staan tereg op twee aanklagte van moord in verband met die dood van Samuel Tjixa en Simon Jubeba. Boeta en Loedie word ook op ʼn derde aanklag van regsverydeling aangekla.

Die verrigtinge het Vrydag begin met die staat wat hul tweede getuie, Lina Maronsela, ʼn werker van die Vrystaatse nooddienste, geroep het. Maronsela het getuig sy is opgelei in intermediêre lewensondersteuning.

Volgens Maronsela was sy die aand van 6 Januarie 2016 aan diens toe die beweerde plaasaanval op Loedie van der Westhuizen sr., Boeta se pa, se plaas gebeur het. Maronsela het getuig sy het ʼn oproep van haar bevelvoerder gekry wat aan haar gesê het om na ʼn toneel te gaan waar twee mans na bewering aangerand en moontlik deur honde gebyt is.

Sy het getuig ʼn ambulans is reeds vroeër na die toneel gestuur en sy het in ʼn reaksievoertuig na die toneel gery. Volgens Maronsela het sy die ambulans en ʼn polisiewa langs die pad gekry. Een van die beseerdes was reeds in die ambulans terwyl die bestuurder en bemanningslid in die ambulans besig was om die tweede beseerde vanaf die polisiewa in die ambulans te laai.

Maronsela het getuig een van die beseerdes het ʼn snywond agter sy kop gehad wat baie gebloei het. Die persoon het ook bloed in sy mond gehad wat sy meen inwendige bloeding was. Die tweede persoon het ʼn snywond aan sy ken gehad. Maronsela het getuig albei beseerdes het kneusplekke aan hul bors en swelling aan hul gesigte gehad.

Terwyl Maronsela die mans se beserings beskryf het, het Ruth Qokotho, Tjixa se ma, uit die hof gestap.

Kobus Burger vir die verdediging het Maronsela tydens kruisondervraging uitgevra oor die twee mans se beserings en het haar onder meer gevra om met haar hand te wys hoe lank die beseerdes se snywonde was. Hy het haar gevra of sy enigiets gedoen het om die bloeding van die snywond aan een van die mans se kop stop te sit. Sy het geantwoord sy het gaas en verbande gebruik om die bloeding te probeer stopsit.

Boeta van der Westhuizen (46) en Anton Loggenberg (50). Foto: Mariné Louren

Maronsela het gesê sy het ʼn drup op albei beseerdes geplaas en saam met hulle agter in die ambulans gery om hul toestand te monitor op pad na die hospitaal. Adv. Jabulani Mlotshwa, vir die staat, het Maronsela gevra of die mans enige inwendige beserings gehad het. Sy het geantwoord sy weet nie omdat sy net hul uitwendige beserings kon sien. Burger het gevra of sy in die beseerdes se oë gekyk het of daar enige reaksie was. Sy het geantwoord dat een van die mans se oë reageer het, terwyl net een van die ander beseerde se oë reageer het.

Ao. Joseph Hunter, ʼn lid van die Parys-speurtak, is ook deur die staat as getuie geroep. Hy het getuig hy is die aand van 6 Januarie 2016 na die plaas Biesiesbult ontbied omdat daar na bewering ʼn plaasaanval was. Hy het verduidelik hy het ʼn lang tyd op die toneel bestee, voordat hy saam met nog ʼn polisiebeampte na die hospitaal in Parys is om die verdagtes van die beweerde plaasaanval te sien wat op die plaas Swartklip aangekeer is.

Hunter het getuig hy het lank vir die ambulans gewag om met die twee verdagtes by die hospitaal aan te kom. Volgens Hunter was albei verdagtes oënskynlik bewusteloos, maar kon hy aan een van die verdagtes nie ooglopende beserings sien nie. Hy het gesê die tweede verdagte, wat ʼn rooi hemp aangehad het, se kop was geswel en daar was bloed aan sy gesig.

Volgens Hunter het ʼn dokter die twee verdagtes gestabiliseer en hulle klere van hulle afgesny. Hunter het die klere in plastieksakke geplaas en saamgeneem as moontlike bewysstukke. Hy het getuig die klere was nat, vermoedelik van water, en daar was ook bloed aan een van die verdagtes se klere.

Hunter het ook getuig hy het op die verdagtes se liggame gekyk of hy enige bytmerke kon waarneem, omdat hy ʼn bewering gehoor het dat die verdagtes moontlik deur honde aangeval is. Hy het gesê hy kon geen bytmerke aan die verdagtes se liggame sien nie, maar het wel drie rooi hale oor een van die verdagtes se bors gesien.

Hunter het gesê hy is die volgende oggend omstreeks 08:00 ingelig dat een van die verdagtes oorlede is, en omstreeks 09:00 dat die tweede verdagte, wat na die Pelonomi-hospitaal in Bloemfontein oorgeplaas is, ook oorlede is.

Hy het gesê hy is later die oggend na die toneel op Swartklip waar die verdagtes aangekeer is. Daar het hy ʼn sakkie dagga en ʼn pakkie sigarette, wat platgetrap is, op die grond opgemerk.

Volgens Hunter het hy vanaf hierdie toneel in die rigting van Biesiesbult gestap om te kyk of hy ʼn vuurwapen êrens in die veld kon sien. Daar is beweer dat die verdagtes ʼn vuurwapen by hulle gehad het, maar daarvan ontslae geraak het voordat hulle aangekeer is. Hunter het getuig hy kon nie ʼn vuurwapen in die veld opspoor nie.

Hy het gesê daar is twee dossiere deur die polisie oopgemaak, een van ʼn plaasaanval en een van moord. Volgens Hunter is hierdie dossiere egter die dag ná die gebeure aan die Valke oorhandig en het hy dus nie verder die sake ondersoek nie.

Die hof is na Maandagoggend verdaag wanneer Hunter kruisondervra sal word. Die verhoor is tot 26 Mei op die hofrol geplaas.

Lees alle vorige berigte oor die Parys-boere op Maroela Media.