Parys-boere se verhoor neem onverwagse wending

Die ses beskuldigdes sit Dinsdagoggend in die beskuldigdebank gereed vir die moordverhoor om te hervat. Van links is Boeta van der Westhuizen, Anton Loggenberg, kapt. Henk Prinsloo, Cor Loggenberg, Loedie van der Westhuizen en Miela Janse van Vuuren. Voor staan Hannes Grimbeek, ‘n lid van die verdediging se regspan. Foto: Maroela Media

Die sogenaamde Parys-boere-verhoor het Dinsdagoggend ʼn onverwagse wending geneem voordat die verhoor in die hooggeregshof in dié Vrystaatse dorp kon hervat.

Boeta van der Westhuizen (46), Loedie van der Westhuizen (19), Anton Loggenberg (50), Cor Loggenberg (20), Miela Janse van Vuuren (23) en kapt. Henk Prinsloo (47) word aangekla van die moord op Samuel Tjixa en Simon Jubeba. Al ses beskuldigdes is tans uit op borgtog en die verhoor is al sedert 2 Mei aan die gang.

Fanie Oosthuizen (44), ʼn plaasvoorman van die Parys-omgewing en ʼn 204-getuie, het Dinsdagoggend gereed gesit in die getuiebank vir die verrigtinge om teen 09:00 te begin, maar die verrigtinge is vertraag nadat die staat ʼn aansoek gebring het dat Anton Loggenberg se borgtog teruggetrek moet word.

Die staat beweer Loggenberg het tydens ʼn gesprek met een van die staat se getuies gedreig om die 204-getuies (wat ‘n ooreenkoms met die staat aangegaan het in ruil vir hul getuienis)dood te maak. Die staat het daarom ʼn aansoek voor landdros Gustav Prinsloo gebring om te versoek dat Loggenberg se borgtog teruggetrek word.

Anton Loggenberg en kapt. Henk Prinsloo in die hof (18 Mei 2017). Foto: Maroela Media

Loggenberg het Dinsdagoggend voor Prinsloo in die Parys-landdroshof verskyn. Adv. Sandile Mtetwa vir die staat het aan die hof gesê hulle versoek dat Loggenberg se borgtog teruggetrek word aangesien hy glo sy borgtogvoorwaardes verbreek het. Kobus Burger, Loggenberg se regsverteenwoordiger, het aangedui dat die verdediging die aansoek teenstaan.

Prinsloo het aan die hof gesê omdat die beskuldigde aan hom bekend is, kan daar moontlik die persepsie ontstaan dat die hof bevooroordeeld in die saak is. Hy het homself daarom van die saak verskoon en die hof het verdaag sodat daar alternatiewe reëlings getref kan word vir die saak om aangehoor te word.

Maroela Media wag steeds om te hoor wanneer die saak aangehoor sal word.

Die moordverhoor wat deur regter Corné van Zyl in die hooggeregshof aangehoor word, is intussen tot Woensdag 09:00 uitgestel sodat die jongste saak eers afgehandel kan word.

Die staatsaanklaers het joernaliste Maandag in die hof versoek om nie foto’s van die 204-getuies te neem nie uit vrees dat hulle geïntimideer sal word. Adv. Jabulani Molotswa vir die staat het gesê die versoek spruit uit ʼn voorval die afgelope naweek, maar hy het nie uitgebrei oor die voorval waarna hy verwys nie.

Lees alle vorige berigte oor die Parys-boere op Maroela Media.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

36 Kommentare

jongste oudste gewildste
m

Sal graag wil weet wat se ooreenkoms met die staat gemaak is in ruil vir getuines…….. laat mens ma net wonder…………………………..

Haan

Dit is gemeen en moedswillig van die staat. Die man is verraai en het net sy teleurstelling (hoewel impulsief) uitgelaat as n dreigement. Voortvarendheid is duidelik n probleem onder hierdie boere, maar nou is die staat onnodig bleddie aspris. Geen regdenkende boer sal midde in dié gemors nog gaan staan en moor nie. Ek bid vir die beskuldigdes. Baie mense sê goed soos “bring terug die doodstraf” ens, Maar besef nie dat die dood se straf tydig of ontydig kan kom nie (soos tjixa en jubeba besef het) Die staat toon net al hoe meer hul onderliggende voorkeur vir die… Lees meer »

Baker

Ek wil net weet hoe is daar 204 getuies.was hulle almal daai dag daar.204 is maar bitter baie getuies.

Sê maar net

Ek dink nie hulle praat van 204 getuies nie, die persoon is ‘n 204 getuie, dit het te doen met sekere artikels van die betrokke wet as ek dit nie mis het nie.

Help

Kan een van julle asseblief vir my verduidelik want ek dink nie ek verstaan lekker wat hier aangaan nie… Beteken dit nou dat Anton terug tronk toe gaan?

En, indien ja…Hoekom net hy…wat van die ander dan?

Ek is engelsprekend…so ek sukkel met van hierdie groot woorde, ek sal julle hulp baie waardeer asseblief.