Parys-boere: ‘Staat het geen bewyse nie’

Boeta van der Westhuizen (links), Johan Cilliers sr., Johan Cilliers jr. en Anton Loggenberg in die beskuldigdebank. Foto: Mariné Jacobs

Boeta van der Westhuizen (links), Johan Cilliers sr., Johan Cilliers jr. en Anton Loggenberg in die beskuldigdebank. Foto: Mariné Jacobs

Die borgtogaansoek van vier boere wat in die Parys-landdroshof verskyn in verband met die dood van twee plaasaanvalverdagtes, sal na verwagting Dinsdagmiddag hervat word.

Boeta van der Westhuizen, Anton Loggenberg, Johan Cilliers sr. en sy seun, Johan Cilliers jr. het Dinsdagoggend in die hof verskyn op aanklag van moord in verband met die dood van twee verdagtes wat na bewering ’n boer op sy plaas aangeval het.

Die klein hofsaal was stampvol gepak met familielede van die beskuldigdes en die oorledenes, verslaggewers en enkele verteenwoordigers van politieke partye. Die saak is deur landdros Leshni Pillay waargeneem.

Die borgtogaansoek het begin met die staat wat die hof versoek het om die saak uit te stel vir verdere ondersoek. Die staatsaanklaer het aan die hof gesê die moontlikheid bestaan dat nog verdagtes in hegtenis geneem kan word en dat die ondersoekspan daarom kans gegun moet word om meer inligting in te win.

Die verdediging het die staat se aansoek teengestaan en gesê die staat het geen bewyse dat die beskuldigdes betrokke was by die dood van die verdagtes nie. Volgens die boere se regsverteenwoordiger het die staat nie konkrete bewyse dat sy kliënte nie net bloot omstanders op die toneel was toe die oorledenes deur ʼn groep boere vasgetrek is nie.

Nadat die hof kortliks verdaag het, het Pillay beslis dat die borgtogaansoek sal voortgaan aangesien die staat genoegsame tyd gehad het om voor te berei.

Intussen het die gemoedere buite die hofgebou hoog geloop terwyl die verrigtinge binne aan die gang was. ANC-ondersteuners het gedans terwyl hulle die omstrede “Kill the boer”-lied gesing het. ʼn Groep plaaslike inwoners wat die vierkleur geswaai het, het in reaksie hierop “Die stem” begin sing.

Teen die tyd wat die hof verdaag het, het oproerpolisie nog meer roldraad om die gebied gespan en ʼn waterkanon is ingebring om die skare onder beheer te hou.

Die hofsaak word om 14:00 hervat.

Klik hier vir alle vorige berigte oor die Parys-boere op Maroela Media.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

72 Kommentare

jongste oudste gewildste
Pieter

As die ANC – ondersteuners die gewraakte “Kill the Boer” – lied sing, is dit nie rassisme en die aanblaas van geweld nie? Maar dit gaan “ongesiens” verby…

Christo Visagie

Het die ANC & EFF gedink dat die boere hulle vir altyd soos lammers ter slagting moet laat lei,,,,,,,,,,,,,,,,,die boere het nou genoeg gehad vir die barbaarse manier wat hulle aangeval en gemoor word. Hoekom is julle nie ook by hofverigtinge as die boere vermoor word nie.

natashia

Die uitspraak is eintlik so eenvoudig! Geen oog getuies, geen saak! Maar met die rasisme is daar vandag so baie getuies hoekom word daar nie iets omtrent dit gedoen nie? Daar word blatant gesing dat ons vermoor moet word!

DPJ

Ek sien nou waarom rassisme wet deur gevoer moet word. Alles optreede en woorde van wittes is rassime en net hulle kan rassisme bedrywe. Aander kulture kan niks verkeer sê of doen nie. Rassisme sal nou besin word soos appartheid asof ‘n nuwe woord gevorm is deur hulle.

Fanie

Ja, die ou spulletjie is maar siek né.