Pasiënt (26) se dood by Helen Joseph ondersoek

Die Helen Joseph-hospitaal in Auckland Park, in die weste van Johannesburg. (Foto: Facebook)

Die Gautengse departement van gesondheid ondersoek die omstandighede rondom die dood van ’n pasiënt by die Helen Joseph-hospitaal in Johannesburg.

Sichelesile Dube (26) is Dinsdagmiddag dood in ’n rolstoel in die ongevalle-afdeling van dié hospitaal op die presiese plek aangetref waar haar ma haar die dag vantevore in die sorg van mediese personeel gelaat het.

Haar mond en oë was steeds oop. Daar word beweer dat ’n ernstige siek Dube ongesiens in die rolstoel gesterf het sonder om enige mediese aandag te ontvang.

Jack Bloom, die DA se woordvoerder oor gesondheid in Gauteng, het Vrydag sy skok uitgespreek oor die dood van ’n pasiënt wat “geïgnoreer is en eindelik gesterf het”.

“Hierdie verskriklike verhaal beklemtoon weer eens die verwaarlosing wat baie pasiënte by Helen Joseph se ongevalle-afdeling beleef. Die eenheid is oorvol en pasiënte wag dae lank voordat hulle in ’n saal opgeneem word.”

Bloom sê voorts die situasie by die betrokke ongevalle-afdeling is intussen vererger weens die druk wat die Covid-19-pandemie op die gesondheidstelsel plaas en die addisionele pasiënte wat na dié hospitaal stroom weens die tydelike sluiting van die Charlotte Maxeke-hospitaal.

Bloom meen dit is egter geen verskoning vir die swak bestuur wat tot Dube se dood gelei het nie.

Bloom sê hoewel daar dadelik ondersoek ingestel moet word, is ’n volledige taksering van die Gautengse departement van gesondheid ook nodig sodat beskikbare fondse effektief bestee word om voldoende personeel en toerusting by alle openbare hospitale te verseker.

Die departement het Vrydag gesê hy het met ontsteltenis kennis geneem van Dube se dood en ’n ondersoek is gelas.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

16 Kommentare

jongste oudste gewildste
Anel

En hulle voer Kubane in en dan wil hulle nog ‘n NGS begin!!! Behoede ons. Jammer vir die familie wat ‘n geluefde ol so ‘n manier verloor het. Onmenslik!!

Annelie

Die probleem by Staatshospitale: Onbevoegde en onbekwame personeel, luiheid, min of geen respek vir pasiënte, geen of min werksetiek. Die personeel wat iets beteken is te min om werklik ‘n verskil te maak en ek laat my nie vertel dat die Minister van gesondheid nie van hierdie probleme bewus is nie. Laat die regeringsamptenare ook na Staatshospitale toe gaan vir mediese behandeling as hulle siek is in plaas van oorsee na Privaat mediese sorg. Wat n skande!

David

Covid het nie dinge vererger nie. Die onbevoegde staat met sy on bevoegde denkwyse wat aandring om onbevoegdes met onbevoegde denkwyses in diens te neem het die hele land versleg.

loddertjie

Skokkend maar nie snaaks vir staatshospitaal nie. Jy is gelukkig as jy gehelp word voordat jy dood gaan.

Pieter

Die ANC land is een groot sirkus sal nooit regkom nie.