Pasiënt dood ná watertekort by hospitaal

Ivan Gerber is vandeesmaand in die Robert Mangaliso Sobukwe-staatshospitaal in Kimberley dood. (Foto: Verskaf)

’n Pa van Gansbaai eis antwoorde nadat sy seun vandeesmaand in die Robert Mangaliso Sobukwe-staatshospitaal in Kimberley dood is – glo omdat dié hospitaal vir drie dae sonder water was.

Volgens Johan Gerber moes sy seun Ivan (36) op 15 April ’n opvolgoperasie ondergaan om sy buik skoon te maak nadat sy blindederm, wat glo heeltemal vrot was, op 14 April by dié hospitaal verwyder is. Ivan het in Kuruman gewoon en gewerk. Die operasie moes egter vir drie dae uitgestel word omdat die hospitaal nie water gehad het nie. Gerber glo dit is dié vertraging wat sy seun se lewe gekos het.

“Ek het die hospitaal elke dag gebel om te hoor wat aangaan. Hulle het gesê dat hulle nie kan opereer nie, want daar is nie water nie.”

Ivan is uiteindelik op 18 April – op sy 36ste verjaardag – geopereer nadat die watertoevoer herstel is.

“Ek het Sondagaand (18 April) ná die operasie telefonies met ’n dokter gepraat wat gesê het dat my seun baie siek is. Hy het ’n ernstige infeksie en geperforeerde kolon gehad,” het Gerber gesê. “Hy is ses dae later dood.”

“Niemand kan vir my antwoorde gee nie. Hoekom is hy nie na ’n ander hospitaal wat wel water gehad het, oorgeplaas om geopereer te word nie?” het Gerber gevra.

Hy is oortuig dat die uitstel van die operasie die infeksie en eindelik Ivan se dood tot gevolg gehad het.

“Ek glo ook dat hulle die probleem met sy kolon vroegtydig sou opgetel het indien hy al op 15 April geopereer was.”

Gerber oorweeg regstappe teen die hospitaal en wag tans vir afskrifte van sy seun se mediese rekords.

Dit blyk dat watertekorte nie net by dié hospitaal ’n probleem is nie, maar reg oor Kimberley.

Volgens Ian Smit, voorsitter van die AfriForum-tak in Kimberley, sit die stad met ’n “reuseprobleem”.

“Die waterinfrastruktuur word nie onderhou of bestuur nie,” het Smit gesê.

Volgens hom het die probleem ook oor die afgelope twee maande drasties vererger.

“Dit het ’n groot impak op nie net hospitale nie, maar ook ouetehuise en skole.”

Hy sê onder meer dat waterpype vrot is en gedurig bars en dat die watertoevoer gereeld afgesny word om herstelwerk te doen.

“Daar is byna nie ’n straat in Kimberley waarin daar nie water afvloei nie,” het Smit gesê.

Volgens hom sukkel die Sol Plaatjie-munisipaliteit ook om reservoirs vol te hou.

“Verder is die kontrakteurs wat die munisipaliteit aanstel om herstelwerk te doen onkundig. Die AfriForum-tak het onlangs met die munisipaliteit vergader om ander oplossings te bespreek. Ek kan sien dat hulle ook baie bekommerd is oor die waterprobleme,” het Smit gesê.

Volgens Wynand Boshoff, VF Plus-leier in die Noord-Kaap, is die munisipaliteit boonop in ’n ernstige finansiële krisis gedompel en lyk die vooruitsigte vir herstelwerk en onderhoud aan die waterinfrastruktuur bleek.

“Die uiteinde is dat enigeen wat vandag betroubare watervoorsiening in Kimberley wil hê, liewer self ’n tenk moet opsit en volmaak wanneer die water vloei. Soos altyd ly armes die ergste, want hulle kan dit nie bekostig nie,” het Boshoff gesê.

Maroela Media het Maandag navrae aan die Robert Mangaliso Sobukwe-hospitaal gerig, maar die bestuur het nog nie geantwoord nie.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

34 Kommentare

jongste oudste gewildste
Misky

Dit is vreeslik hartseer en sterkte aan die familie. Kry dalk ‘n tweede opinie ook en daai hospitaal gaan nie eerlik en oop kaarte speel en die ware mediese verslag gee nie

Tipper

Hulle gaan wegkom met dit.

Jeff

Kla die regering aan vir ” MOORD” want dis wat dit is. Niks anderste. Afriforum sal help. Hulle is ysters

Tanja

anc julle is seker baie trots op diè wonderlike nuwe SA ????????

Phil

Kyk as dit met my kind gebeur het sleep ek hulle hof toe tot daai hospitaal bankrot is. Dan vat ek die regering aan. Medelye daar, dit was net onnodig