Passasiers skarrel toe bus vlamvat

Nooddienste op die toneel. (Foto: Netcare 911)

Die passasiers van ʼn bus het Woensdagoggend ʼn noue ontkoming gehad toe dié bus op die N1 in Johannesburg aan die brand geslaan het.

Shawn Herbst, woordvoerder van Netcare 911, sê in ʼn verklaring die passasiers kon daarin slaag om net betyds uit die brandende bus te ontsnap toe dit naby die William Nicol-afrit op die N1 in Fourways in die rigting van Rivonia vlamgevat het.

Volgens Herbst is die nooddienste omstreeks 06:53 na die toneel ontbied waar die brand intussen na die wa van ʼn vragmotor versprei het.

Bagasie het verspreid oor die toneel gelê soos passasiers gespook het om hul besittings te red.

Die verkeer het weens die voorval in die gebied opgehoop. Russel Meiring, woordvoerder van ER24, sê in ʼn verklaring die nooddienste het vanoggend gesukkel om op die toneel te kom weens motoriste wat die noodbaan gebruik het.

Meiring versoek motoriste om plek te maak vir nooddiensvoertuie en liefs nié van die noodbaan of van die skouers van ʼn pad gebruik te maak nie.

“Ons probeer om so gou as moontlik op die toneel van ʼn noodgeval te kom aangesien enkele minute die verskil tussen lewe en dood kan beteken. Ons doen ’n beroep op die publiek op ons paaie om meer vergewensgesind teenoor ons te wees,” sê Meiring.

Die besonderhede oor hoe vanoggend se brand ontstaan het, is onduidelik. Die plaaslike owerhede was wel op die toneel.

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

9 Kommentare

jongste oudste gewildste
Danie

En die noodbaan is deur SELFSUGTIGE mense gebruik wat GEEN RESPEK aan andere kan betoon nie. Daar is groot fout in ons samelewing.

Selfs toe ek enkele maande gelede in stadsverkeer met noodligte aan met ‘n familielid hospitaal toe probeer jaag het, het die meeste mense nie saamgewerk en padgegee nie. Nee wat, hulle bly in die pad en maak asof hulle nie jy en jou noodgeval respekteer nie.

Ons samelewing is vrot en ons moet ernstig introspeksie doen.

Fanie Meintjes

Ons almal weet en beleef daagliks hoe taxi’s en dan ook ander voertuie verbysnel in die noodbane. Wetstoepassing is amper “non-existent” en somstyds volg selfs verkeersvoertuie die taxi’s EN nie om hulle af te trek nie. Sou verkeersdepartemente die nodige wetstoepassings OP DIE REGTE PLEKKE EN TYE doen, sal hierdie oproep van hulle nie nodig wees nie. Die wette is reeds daar, dit moet net toegepas word deur verkeer. Dit sal sommer die sterftesyfers op ons paaie ook verminder as daar weer paddissipline is. Tans is daar geen of min respek vir ander padgebruikers op meeste van ons paaie en… Lees meer »

boet

Lyk vir my soos n trok wat brand nie n bus nie.

Thinus Erasmus

Noodbaan sal net oop bly as dit met beton afgesper word!

jennefer

Bus vol Zimbabiers oppad huis toe. Hoop nie daar was n gasbottel aan boord nie.