Argieffoto
ʼn 21-jarige bendelid van Port Elizabeth, wat gesoek is op aanklag van moord, het homself aan die polisie oorgegee.
Kol. Priscilla Naidu, woordvoerder van die polisie, het gesê die verdagte het homself Woensdagmiddag aan die provinsiale bende-ondersoekeenheid oorgegee. Die jong man is gesoek in verband met die moord op Randy van Reenen (35), wat Sondagmiddag buite ʼn huis in Librastraat, Gelvandale, doodgeskiet is.
“Volgens inligting het Van Reenen saam met twee ander persone buite die huis gestaan en rook,” het Naidu verduidelik. “Twee mense, wat hulle ken, het hulle genader. Van Reenen het in die huis in gegaan. Die verdagtes het by die hek gestaan en hom geroep. Hy het weer uit die huis gekom en met een van die mans begin baklei. Een van die verdagtes het ʼn vuurwapen te voorskyn gebring en Van Reenen in sy kop geskiet.”
Van Reenen is op die toneel dood en die twee verdagtes het te voet gevlug.
Die oorledene en die verdagte is albei lede van die Sestien Honde-bende.
Naidu sê die motief vir die moord is vermoedelik interne konflik binne die bende. Die verdagte sal Vrydag in die landdroshof in Port Elizabeth verskyn.
