PE se nuwe naam bly – en basta!

Besware teen Port Elizabeth se naamsverandering na Gqeberha, is van die hand gewys. (Foto: DA)

Die departement van sport, kuns en kultuur het Sondag aangekondig dat hy die proses om klagtes oor naamsveranderinge vir verskeie plekke in die Oos-Kaap te oorweeg, afgehandel het. Dit sluit in die verandering van Port Elizabeth na Gqeberha en Uitenhage na Kariega.

“Die minister het alle besware teen die betrokke naamsveranderinge, soos op 23 Februarie in die Staatskoerant gepubliseer, oorweeg. Na afloop hiervan is daar besluit dat geen van die klagtes wat geopper is, die hersiening van die besluit om die name te verander regverdig nie,” het die departement in ʼn verklaring gesê.

Daar was uit die staanspoor hewige teenkanting uit verskeie oorde nadat Nathi Mthethwa, minister van kuns en kultuur, in die Staatskoerant aangekondig het dat verskeie dorpe, stede en lughawes in die Oos-Kaap se name verander word.

Benewens Port Elizabeth en Uitenhage het King William’s Town na Qonce verander, Maclear na Nqanqarhu en Berlin heet nou Ntabozuko.

Die Port Elizabeth-lughawe se naam het verander na die Hoofman Dawid Stuurman-lughawe en die Oos-Londen-lughawe verander na die Koning Phalo-lughawe.

Selfs die Nelson Mandelabaai-metro in die Oos-Kaap was nie tevrede met die naamsverandering nie en het ’n formele voorlegging ingedien, waarin beswaar aangeteken word teen die naamsverandering van Port Elizabeth na Gqeberha. Een van die besware was dat nie nuwe naam geen verbintenis met die mense van die metro het nie.

Luidens die departement se verklaring het hy ʼn petisie met meer as 12 000 handtekeninge van inwoners van die Nelson Mandelabaai-metro ontvang, asook 690 e-posse wat ontevredenheid met die betrokke naamsveranderinge weergee.

Die departement sê van die besware wat hy departement ontvang het, is dat die nodige openbare insette nie verkry is alvorens die name verander is nie, alternatiewe name nie oorweeg is nie en dat naamverandering nadelig vir toerisme in dié gebied sou wees. Nóg ʼn beswaar was dat die geld wat gebruik sal word om name te verander, eerder aangewend kan word om dienslewering te verbeter. Nie een van dié argumente het skynbaar vir die departement gewig gedra nie, en al die besware is van die hand gewys.

“Die minister wil graag inwoners daaraan herinner dat die naamsveranderinge ten doel het om te verseker dat plekname die taal, kultuur en erfenis van ʼn bepaalde gebied, eerder as die verlede van kolonialisme en apartheid weerspieël,” lui die verklaring.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

52 Kommentare

jongste oudste gewildste
casper

Dit bly dus ‘n Que mors ne !!

Hydi

Verander dorpsname, breek standbeelde af, verander straatname – niks verander ‘n volk se siel nie.

Gert

Sy het net aangegaan met haar dinge en niks gevoel vir die mense wat daar bly nie. Ras kaart niks snaaks daar nie

Tipper

Ons hou maar net by Port Elizabeth,nou Geberha,dan Gemorsa.

Persheks Adri

Al wéér apartheid! Die geld kon beslis vir beter dinge gebruik word. Die redenasie vermoë van die mannetjie gaan my gesonde verstand te bowe hy’s openlik rassisties