Personeel en gaste by luukse hotel aangehou, beroof

Die luukse Belmond Mount Nelson-hotel in Kaapstad. (Foto: Ayanda Ndamane, ANA)

Die personeel en gaste by ’n vyfsterhotel in Kaapstad is Dinsdagaand deur ’n groep van 15 mans oorval, aangehou en beroof.

Kapt. FC van Wyk, woordvoerder van die polisie, het Woensdag in ʼn verklaring gesê die verdagtes het in twee motors by die luukse Belmond Mount Nelson-hotel in Tuine aangekom waarna hulle die sekuriteitswag by die hotel se hek met ’n vuurwapen gedreig het.

Twee van die verdagtes het die wag se slaanstok en handradio van hom afgeneem en by hom gebly terwyl die res van die groep die hotel binnegegaan het.

“Hulle het twee vuurwapens op die personeel en gaste gerig en toe hul persoonlike besittings gesteel,” lui die verklaring.

Volgens Van Wyk het die verdagtes toe vertoonvensters in die portaal van die hotel met groot hamers gebreek en juwele gesteel. Hulle het ook kontant uit ʼn kasregister gesteel waarna die groep mans op die vlug geslaan het.

“Polisie-ondersoekers het dadelik ’n multidissiplinêre aksiespan geaktiveer en die misdaadtoneel gefynkam vir enige bewyse. Speurders volg alle leidrade op,” het Van Wyk gesê.

Niemand is nog in hegtenis geneem in verband met die voorval nie.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

27 Kommentare

jongste oudste gewildste
Wurmpie

En dit gaan net aan en aan en aan. Misdadigers word mos beskerm in die land

Suid-Afrika is ‘n skande vir die mensdom

Misdaad in Suid-Afrika is buite beheer. Kriminele is in beheer en veroorsaak groot moleste orals. En dit is altyd so lekker om “High Tea” by die Mount Nelson te geniet. Nou sal mens maar moet kyk vir ‘n ontsnappingsroete met jou koppie tee in die hand om inderhaas pad te gee voordat hierdie kriminele jou kry. Dit is ‘n skreiende skande dat Suid-Afrika so vinnig en drasties agteruit gegaan het tot ‘n ashoopstatus. Normale daaglikse aktiwiteite is nie meer die gewone mens in hierdie land beskore nie want jy word of vermoor of beroof.

John

… en gebeure soos diè is hoekom toeriste die landjie nou vermy. Busse word aangeval, stappers beroof, navorsers vermoor, weldoeners aangeval en winkels en voertuie aan die brand gesteek. Verder is die land smerig en sonder krag of water. Wie wil in ruim van ‘n vliegtuig in ‘n doodskis of erg beseer weer tuis aanland en nogal duur betaal vir die spulletjie?

marous

Groep van 15 . Dit hoef nie eers oorsee gestuur te word nie . Plak dit sommer op hoed se stoel binne in die parleniksbeteken .

Werner

15 Rowers met 2 sedans… kon seker nie baie wegdra nie