Petrolbom glo gebruik om kerk af te brand

Die brandweer was binne 20 minute op die toneel, maar kon die 38 jaar oue gebou nie red nie. Foto: Facebook

Die polisie in Noordwes ondersoek ʼn saak van brandstigting nadat ʼn Afrikaanse kerk op Rustenburg na bewering met ’n petrolbom aan die brand gesteek is.

“Die polisie ondersoek die moontlikheid van brandstigting,” sê kol. Adéle Myburgh, Noordwes-polisiewoordvoerder. “Die oorsaak van die brand is nog nie bepaal nie.”

Luidens gerugte in die sosiale media is die Hervormde Gemeente Rustenburg-Kloof se kerkgebou in Geelhoutpark met ʼn petrolbom aangeval, waarna dit afgebrand het.

Die NHKA Gemeente Rustenburg-Kloof se kerkgebou is in 1980 opgerig. Foto: Facebook

Myburgh het Sondag gesê sy kan nog nie bevestig of dit wel die geval is nie, berig African News Agency.

Maroela Media het Sondagmiddag berig die gemeente is dankbaar dat hul lapa nie ook in die slag gebly het in die brand wat vroeg Sondagoggend hul kerkgebou in puin gelê het nie.

Yvette Enslin, vrou van ds. Nardus Enslin, het vertel die kerk se alarmmaatskappy het kort ná 01:00 Sondag pastorie toe gebel om te sê iets skort by die kerk, sowat 15 m daarvandaan. Haar man wou dit om veiligheidsredes nie waag om alleen kerk toe te gaan nie en het gevra dat hulle iemand uitstuur.

Die dak het van die geweldige hitte van die brand ineengestort. Foto: Facebook

Om 01:22 het die alarmmense weer gebel, dié keer om te sê die kerkgebou brand. Sy kon nie uit hul slaapkamer sien die kerk brand nie, maar van die studeerkamer se balkon af was die rookwolk en die vlamme wat ál hoër bo die kerk se dak uitgeklim het, duidelik sigbaar.

Die brandweer was binne 20 minute op die toneel, maar toe was dit reeds te laat om die kerkgebou te red. Enslin vertel hulle het dit wel reggekry om die kategeselokaal ʼn hanetree van die kerk af te red; net die ruite het gebars en die deure swart gebrand.

Waarvoor die gemeente die dankbaarste is, is dat die brandweer die lapa kon red. Enslin vertel hulle het nie ʼn kerksaal nie, maar kom altyd daar vir geleenthede bymekaar.

Met Doopsondag oor ʼn week sal hulle ook die lapa gebruik en ʼn doopvont wat een van die plaaslike NG gemeentes aangebied het om vir hulle te leen.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

24 Kommentare

jongste oudste gewildste
lewies

Ons wag in spanning om verdere nuus te kry en die moontlike oorsake van hierdie saak. ‘n Petrolbom dui op ‘n weerwraak. Ons sal graag volle besonderhede van hierdie saak wil verneem. Waarskuwingsligte vir ander gemeentes. Verder se ek niks meer nie.

Sarel

Hoeveelste geval van Brand is dit wat voorgekom het insluitende skole en niemand wat ek van weet is nog daarvoor aangekeer nie?? Hoekom???

Dries du Toit

Weer n polities geinspireerde aksie verseker

Se maar net

Om n lee afrikaanse kerk met n petrolbom te vernietig dui vir my op geestelik en nie polities nie.

Joe

Iemand gaan eendag baie moet verduidelik!