Paramedici het Donderdag gereageer op ʼn noodoproep van ʼn verdrinking in The Reeds, Centurion.
Volgens inligting wat Netcare911 se ambulansdiens ontvang het, het lede van ʼn gesin omstreeks 10:20 ʼn tweejarige kind in die swembad aangetref. Die seun het nie gereageer nie. Familielede het hom uit die swembad gehaal en die ambulansdienste ontbied.
“By ons aankoms op die toneel het die kind nie behoorlik asemgehaal nie,” sê Shawn Herbst, woordvoerder van Netcare911. “Paramedici van Netcare911 en Emer-G-Med het hom probeer bybring.
“Hierna is die pasiënt oorhandig aan Netcare se helikopter en bemanning van die lugambulans, wat die pasiënt na ʼn spesialis-fasiliteit vervoer het vir verdere behandeling.”