Piet Byleveld ernstig siek in hospitaal

Piet Byleveld. Foto: Maroela Media

Piet Byleveld. Foto: Maroela Media

Oudbrig. Piet Byleveld word in ʼn hospitaal in Roodepoort behandel nadat kanker Vrydag by hom gediagnoseer is.

Roodepoort Record berig Byleveld is glo in ʼn ernstige toestand en die kanker is in ʼn gevorderde stadium. Volgens Roodepoort Record het Byleveld se familie vir dr. Janie Kriel, die internis wat Byleveld behandel, toestemming gegee om met die media te praat.

Kriel se ontvangsdame het egter by navraag gesê geen toestemming is gegee om met Maroela Media te praat nie.

Dit is nie die eerste keer dat navrae in verband met Byleveld onbeantwoord bly nie. Maroela Media het in Oktober verlede jaar die nuus gebreek dat talle geliefdes van moordslagoffers beweer Byleveld het hulle met duisende rande ingeloop.

Verskeie mense het beweer hulle het Piet Byleveld Crime and Commercial Investigations (PBCCI) groot bedrae geld betaal om moordsake te ondersoek, maar daar het glo dadels van die ondersoeke gekom.

Die sentrum waar die kantoor van Piet Byleveld Crime And Commercial Investigations glo sonder enige kennisgewing ontruim is.

Die sentrum waar die kantoor van Piet Byleveld Crime And Commercial Investigations glo sonder enige kennisgewing ontruim is.

Byleveld het destyds by monde van sy regsverteenwoordigers, Scholtz Prokureurs, gesê hulle sal die bewerings “op die gepaste tyd en forum hanteer”. Byleveld het egter nooit op die bewerings gereageer nie. Ná nog navrae van Maroela Media het Scholtz Prokureurs Maroela Media in Januarie in kennis gestel die maatskappy se mandaat met Byleveld is beëindig.

Verdere pogings om Byleveld direk te kontak was weer onsuksesvol.

Byleveld het al op talle groot en opspraakwekkende sake gewerk, waaronder die moorde op Sheldean Human, Inge Lotz en Leigh Matthews. Nadat hy in 2010 afgetree het, het hy begin om misdaadsake in sy persoonlike hoedanigheid te ondersoek. PBCCI se kantore is verlede jaar glo sonder enige kennisgewing ontruim en die onderneming het vermoedelik finaal sy deure gesluit.

Lees alle vorige berigte oor Piet Byleveld op Maroela Media.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

30 Kommentare

jongste oudste gewildste
Christien

Nou moet Maroela weer die ou koeie uitgrawe soos suur druiwe. Vertel ons eerder iets nuut ivm Brig Piet se gesondheid.

rina

Mnr Byleveld, ou John het ongelukkig nie fb of internet en sulke fancy goed nie, Maar hy sé hy wet nie of jy hom kan omthou, hy het jou in 2011 amper R9000.00 betaal om sy vermiste kind op te spoor, Maar hy se jy moet nie meer moeite doen nie, hy is nou besig om hom dood te laat verklaar, Hy wou dit self vir jou gesé het, maar hy weet nie waar om jou op te spoor, aangesien jou kantooe waar hy julle die geld gegee het,gesluit het. Sterkte mnr Byleveld en mag alles goed gaan, en ons… Lees meer »

Riki

Ai tog!!! Rook!!!! Dis net verbasend hoe mens jou geliefdes soebat om op te hou rook en drs hulle waarsku om op te hou weens hulle gesondheid en hulle net weerbarstig is daaroor tot die noodlot toeslaan. Ek weet waarvan ek praat!!! My man is 2 jaar gelede dood nadat hy met emfiseem en kanker gediagnoseer is en uiteindelik aan ‘n hartaanval oorlede is.

Lourens Erasmus

Dis jammer oor die kanker. Dis ook jammer vir al die mense wat hom geld gegee het en niks daarvoor gekry het nie. Dis ook jammer dat hy nou as ‘n skelm onhou gaan word. Wou nog iets oor daai ander meisie – Karma – ook gese het. Hou bietjie terug.

Johann Barnard

Mense,julle moenie meer worry oor die geld wat die oom julle skuld nie.Die oom kan dit nie saamvat nie!!