Plaasaanval: Boer herleef nagmerrie in hof

WAARSKUWING: Die inhoud van die berig kan sensitiewe lesers ontstel

ʼn Bejaarde boer het Woensdag in die Lichtenburg-streekhof in Noordwes getuig oor die verloop van ʼn plaasaanval wat op 18 November 2012 naby Biesiesvlei plaasgevind het.

Die beskuldigde, Mosimanegape Hans Lekgetho (24), word aangekla van roof met verswarende omstandighede nadat hy meer as R50 000 se goedere geroof het en sy slagoffers ernstige liggaamlike leed aangedoen het.

Die klaer, mnr. Jan Pretorius (72), het aan die hof gesê dat hy van plan was om te gaan skape tel toe hy skielik in sy huis deur iemand met ʼn ysterstaaf op die skouer geslaan en oorrompel is. Volgens Pretorius was daar moontlik tot soveel as vier aanvallers, maar was dit moeilik om tred te hou aangesien daar driehoekige doeke om hulle gesigte gebind was en net hul oë uitgesteek het.

Die booswigte het toegang tot sy kluis verkry en sy eie 9mm-pistool gespan, teen sy kop gedruk en die sneller getrek. Die skoot het nie afgegaan nie. In ʼn stadium was hy in die badkamer toegesluit en moes hy hulpeloos sy vrou in die kombuis se hulpkrete aanhoor. Die klaer is later weer uit die badkamer gelaat en het opgemerk dat sy eggenoot ʼn bebloede lap om haar hand gehad het. Hy het eers later, na afloop van die aanval gemerk dat haar pinkie byna heeltemal afgesny is deur die aanvallers. Die aanvallers het deurentyd beurte gemaak om hulle aan te rand, te skree en te vloek aldus Pretorius.

Tydens die gebeure was mev. Pretorius selfs aangesê om haar te ontklee omdat hulle wou sien hoe die egpaar gemeenskap het. Sy het egter geweier en die rowers meegedeel dat dit onmoontlik is weens ʼn siektetoestand waaraan sy ly en hulle het daarna die voorstel laat vaar.

Die aanval was egter nog nie verby nie en die rowers het die egpaar in die sitkamer op ʼn rusbank laat sit en hulle dowe hond wat intussen vrekgemaak is se karkas tussen hulle kom neergooi. Dit het later aan die lig gekom die hond is met ʼn ysterstaaf doodgeslaan. Beide oumense is met kabelbinders vasgemaak en die aanvallers het voortgegaan om die huis te deursoek en goedere in hulle voertuig te laai. Een van die rowers het ʼn windbuks oorgehaal, die loop teen mnr. Pretorius se oog gedruk en die sneller gedruk. Die proses is met sy ander oog herhaal, maar daar het telkens geen lug of projektiel uit die loop gekom nie, aangesien daar ʼn vasgeknypte koeëltjie vasgesit het sedert sy kleinseun dit die laaste keer gebruik het.

Hulle is deurgaans geklap en gevloek en mnr. Pretorius het die hof vertel dat hy selfs met ʼn kombers toegemaak is aangesien die rowers waarskynlik ongemaklik gevoel het. Hulle het paraffien in die motorhuis ontdek en dit oor hom uitgegooi, wat sy oë laat brand en sy sig belemmer het. Hierna is daar talle kere met vuurhoutjies gepoog om sy baard aan die brand te steek, maar die brandstof wou nie vlam vat nie en sy baard is net geskroei. Tydens hierdie pogings het die aanvallers die egpaar toegesnou dat hulle “wit vuilgoed” is en dat hulle verbrand gaan word, het mnr. Pretorius getuig. Volgens hom was daar ʼn speelgoedmotorfietsie in die vertrek en toe die een rower per abuis daaraan raak het dit ʼn Kersfeesdeuntjie gespeel, waarna dit op die grond gegooi en stukkend getrap is.

Op dieselfde tydstip toe die rowers die voertuig by die motorhuis uittrek het die egpaar se dogter toevallig in haar voertuig opgedaag by die motorhek , en die rowers het met die egpaar se voertuig deur ʼn ander motorhek vanaf die toneel gevlug. Op ʼn vraag van streeklanddros Louis Virtue het mnr. Pretorius geantwoord dat hy fisies genees is, maar geestelik gekrenk voel ten spyte van behandeling wat hy ontvang het. Die Staat het ʼn fotoalbum as bewysstuk ingehandig nadat die tonele daarop deur mnr. Pretorius geëien is. Hy was sigbaar aangedaan toe hy getuig het oor die bloedspatsels op die kombuiskaste in die foto’s. Die saak duur voort en is uitgestel tot 6 Oktober vir verdere staatsgetuies se getuienis. Die ondersoekbeampte is ao. Adam Phukuntsi van die Biesiesvlei-polisiestasie.