Plaasaanval: Dogter ontsnap ná pa voor haar vermoor word

Argieffoto

Nóg ʼn boer is dood toe ʼn groep verdagtes Saterdagaand laat ʼn gesin van Broederstroom in Noordwes in hul huis aangeval en gemartel het.

Volgens getuies is die boer en sy gesin glo net na middernag op hul plaas oorrompel en etlike ure lank gemartel voordat die verdagtes hom later geskiet het.

Lorenz Jooste, een van die getuies, vertel Sondag aan Maroela Media hy en sy verloofde was op pad terug van Roodepoort op die Muldersdrifpad toe hy ʼn vrou in die middel van die pad opgemerk het. Volgens Jooste het die vrou gepoog om ʼn motor langs die pad te laat stilhou.

“Ek wou eers nie stop nie omdat ek in die verlede al ʼn bloutjie geloop het, maar iets het my genoop om terug te draai en hulp aan te bied. Die vrou was in ʼn histeriese toestand, sy kon amper nie praat nie. Haar regterskoen was deurgeloop, sy was vol bossies en blare. Ons kon sien iets verskrikliks het gebeur.”

Jooste sê die vrou het uiteindelik aan hom en sy verloofde gesê dat haar pa pas geskiet is deur verdagtes wat hulle in die huis oorrompel het. “Sy het gesê die verdagtes het by die deur ingestorm en haar pa koelbloedig doodgeskiet. Hulle wou haar vasmaak en het haar gedwing om inligting te gee soos wanneer haar sussie tuis sou kom. Haar sussie was in daardie stadium in ʼn kroeg naby aan die plaas en die verdagtes wou haar ook oorval het wanneer sy tuisgekom het. Sy het die inligting glo gegee omdat hulle haar gedreig het, maar daarin geslaag om los te kom en het weggehardloop.”

Hy sê sy was “geweldig getraumatiseerd”. Jooste het toe na ʼn nabygeleë vulstasie gejaag waar hy die polisie op die 10111-noodnommer ontbied het, maar niemand het glo geantwoord nie. Die getraumatiseerde vrou kon egter binne die winkel van die vulstasie haar man, wat in Stellenbosch bly, bel, en haar man het op sy beurt haar suster gebel en vir haar gesê om nié na die plaas terug te keer nie.

“Dit was net betyds. Die vrou se sussie was glo reeds op pad na die plaas toe, maar hulle het toe by ons aangesluit by die vulstasie. Dit was ʼn geweldige slegte ervaring.”

Die groep het in dieselfde tyd daarin geslaag om die Hartbeespoort-polisie te ontbied wat toe na die toneel is. Jooste sê hy het saam met die groep agter die polisie aangery.

“Die polisie het op die toneel skote geskiet. ʼn Mens is nogal bang, jy weet nie wie is geskiet nie. Ek was gewapen, maar wou nie binnegaan nie omdat ek nie geweet het wat presies op die toneel aangaan nie. Ons het ʼn rukkie later ʼn oproep ontvang wat sê dat alles veilig is en dat ons kan binnekom.”

Die presiese gebeure rondom die voorval is nie bekend nie. Die polisie het die voorval aan Maroela Media bevestig. Lt.kol. Amanda Funani, woordvoerder van die polisie, sê die polisie ondersoek die voorval. Niemand is nog in hegtenis geneem nie.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

79 Kommentare

jongste oudste gewildste
Madelein

Die feit dat hulle die ander suster wou inwag maak hierdie ‘n beplande aanval. Hulle wou seker die hele familie uitwis. Dan wil die regering ons vertel dis net ‘robberies’. Ons moet aanhou om hierdie gruweldade aan die wereld te verkondig.

Boer

Iets moet ons doen……dit kook hier binne my!!

Johanné steyn

Dit het ‘n cliché geword in ons media: “Niemand is nog in hegtenis geneem nie”!

KG

Die hemel alleen weet, ek weet nie meer wat om te dink en se nie. In my lewe het ek lanklaas so ongelooflik moedeloos gevoel oor die krisis toestand in ons land!!!

Ek is so bitter jammer vir hierdie familie (en die Stellenbosch boer s’n) se tragiese ervaring en wens hulle alle sterkte toe!!

George

“Die polisie kon nie onmiddelik bereik word nie” en “nog niemand is al on hegtenis geneem nie” is deesdae die standaard.Hoe lank nog kan dit nog so aangaan voordat hier oorlog kom? Hoe lank moet ons hierdie nonsens nog opvreet?