Plaasaanval op video vasgevang: ‘Hulle was daar om moord te pleeg’

Harm Bonnema (Foto: Verskaf)

“Dit was so sinneloos. Dit blyk dat hulle net daar was om moord te pleeg en vir geen ander rede nie.”

Só sê Annelie Botha nadat haar pa, Harm Bonnema, Maandagaand inderhaas per helikopter na ʼn Johannesburgse hospitaal gevlieg is nadat hy vier keer op sy plaas buite Marble Hall geskiet is.

Bonnema (71) sterk tans in die waakeenheid van dié hospitaal aan en sal na verwagting vandag sy eerste operasie ondergaan sedert hy met skietwonde aan sy bors, arm en bobeen opgeneem is.

Botha het vanoggend aan Maroela Media gesê haar pa is Maandagaand in ʼn kritieke toestand opgeneem waarna hy gestabiliseer en vir eers gemaklik gemaak is. As alles goed gaan, sal dokters vandag vir die eerste keer aan sy arm en moontlik ook sy been opereer.

“Sy linkerarm is op die stadium ʼn bekommernis. Die arm is nog baie geswel. Die regterbeen het ook senuweeskade opgedoen. Dit belemmer die beweging en sensasie in die onderbeen, enkel en voet,” verduidelik sy.

Bonnema was ten spyte van sy beserings teen Dinsdagaand in ʼn stabiele toestand. “Hy gesels en is weer sy grapperige self,” vertel sy dogter.

Hy kan ook alles van die aanval onthou en praat daaroor. “Hy hanteer dit baie goed. Die mense om hom is wel baie getraumatiseerd. Die impak van só ’n ding is groot op die familie en vriende,” verduidelik Botha.

Haar ma, Susan, is veral getraumatiseer aangesien sy in die huis was ten tyde van die aanval, vertel sy.

Maroela Media het vroeër berig Bonnema het die aand omstreeks 19:00 na die bakkie toe gestap om ʼn sleutel te gaan haal, toe hy oorval is. Botha het gesê die aanvallers het haar ouers vermoedelik voor die tyd dopgehou. “Dis gewoonlik die tyd wanneer my ma ʼn laaste sigaret buite gaan rook, en hulle het waarskynlik gedink dis ʼn goeie tyd om toe te slaan, omdat my ma ʼn sagte teiken sou wees. Hulle het waarskynlik nie my pa verwag nie.”

Bonnema het onraad vermoed, maar nog voor hy kon reageer, het twee persone hom oorval. Daar was ʼn struweling en hy is vier keer geskiet.

Susan was in die huis en wou gaan ondersoek instel. “My pa het net vir haar geskree sy moet die deure toemaak en dit sluit,” het Botha gister gesê.

Sy vertel dat Bonnema op die buurplaas grootgeword het waarna hy en Susan ná hul troue na die plaas, waar die aanval plaasgevind het, getrek het. Die egpaar se kinders het op dié plaas grootgeword.

“Ons hoop dat my ma berading vorentoe sal kry. Dit is belangrik dat die familie ondersteuning kry in so ’n proses.”

Botha vertel dat die kinders by hul onderskeie huise was toe hul kort na die aanval oproepe van familie en vriende ontvang het om hulle in te lig oor wat gebeur het. Susan het die plaaswag op die gemeenskapsradio ná die aanval ontbied waarna die nuus vinnig versprei het.

“Dit is nie ʼn oproep wat jy vir enige iemand toewens nie,” erken sy.

Die burgerregte-organisasie AfriForum het sedertdien beeldmateriaal van die aanval op Bonnema, wat deur veiligheidskameras vasgevang is, in ʼn video saamgevat wat versprei word om bewusmaking oor plaasaanvalle te skep. “Dit is seldsaam dat die gebeure tydens ʼn plaasaanval só duidelik op video vasgevang word,” verduidelik die organisasie.

Die video word met toestemming van die Bonnema-familie op Maroela Media gepubliseer.

[WAARSKUWING] Die gebeure in die video is ontstellend en nie geskik vir sensitiewe kykers of kinders nie.

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

75 Kommentare

jongste oudste gewildste
Vicky

Die wrok /haat raak al meer. Die Liewe Vader sal met elkeen van hulle af reken!!!

Paaries

Vicky, Andile van die BLF het oorlog verklaar teen die blankes en daar is die voetsoldate in aksie. Hoeveel meer bewyse wil julle he? Die Here help diè wie hulleself help.

Dries Moolman

Ongelukkig sal hierdie beeldmateriaal nie so wyd en syd versprei word deur al wat ‘n twitterer is soos ‘n foto van ‘n Gr 1 klaskamer in Schweizer-Reneke nie, want dit pas nie in by die narratief wat gedryf word in hierdie land nie. En die hoofstroom media self sal dit ook geriefliksheidhalwe ignoreer.

Daan

Post die video en ander berigte van plaasaanvalle op die ANC se webblad want volgens die ANC is daar nie so ‘n ding soos plaasaanvalle in ons land nie.

Anoniem

Hoe kan die lafaardsdade toegelaat word en die Regering kap ‘n blinde OOG !