Plaasaanvalle: Wanneer gaan u ophou swyg, mnr. die president?

Pres. Cyril Ramaphosa. (Foto: GCIS)

Die DA het opnuut ’n beroep op pres. Cyril Ramaphosa gedoen om sy stilswye rakende die toenemende aantal plaasaanvalle en ‑moorde in die land te verbreek.

Dianne Kohler Barnard, LP en voorsitter van die DA se werkstroom oor landelike veiligheid, het Dinsdag in ’n verklaring gesê die opposisieparty het verlede week ’n debat van nasionale belang in die Nasionale Vergadering versoek wat plaasaanvalle en ‑moorde betref. Die regering het sedertdien nog geen aanduiding gegee of die probleem aandag gaan geniet nie.

“Ongelukkig is dit nie vreemd vir ’n regering wat graag boere prys as hulle dit nodig het nie, maar nooit die boeregemeenskap help wanneer dit in ’n krisis is nie,” het Kohler Barnard gesê.

Dié harde woorde kom te midde van nog ’n aanval vroeër vandag op ’n kleinhoewe in die Sinoville-omgewing, noord van Pretoria.

Maroela Media het vroeër berig ’n bejaarde paar en ’n 45-jarige man is deur drie aanvallers oorval en aangerand. Die aanvallers het in die vroeë oggendure die huis binnegekom. Hulle het die kombuisdeur se staalhek gebreek.

(Argieffoto: Maroela Media)

Dit volg kort op twee plaasaanvalle oor die naweek in onderskeidelik  Limpopo en die Vrystaat.

Kohler Barnard wys in die verklaring daarop dat die Afrika-sentrum vir voedselsekerheid van mening is dat die onderliggende kwessie van voedselonsekerheid tot die styging in misdade op plase bydra.

“Een ding wat mense van alle sosio-ekonomiese omstandighede in Suid-Afrika in gemeen het, is die feit dat byna niemand veilig voel in hul eie huise nie. Gewelddadige misdaad is wydverspreid, maar min misdade blyk so ’n swak reaksie van die regering te kry soos plaasaanvalle.

“Die slagoffers van hierdie aanvalle word dikwels op die wreedste maniere gemartel en die meeste word as gelukkig beskou as hulle nie sterf nie. Tog bly die regering stil,” het Kohler Barnard gesê.

Volgens die Transvaalse Landbou-unie (TLU SA) het sedert 1 April reeds 59 plaasaanvalle en 12 plaasmoorde in die land plaasgevind.

“Geen moontlike oplossings is voorgelê nie en geen veldtogte is van stapel gestuur om die veiligheid van diegene in landelike gebiede te verseker of om daarby betrokke te raak nie,” het Kohler Barnard bygevoeg.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

40 Kommentare

jongste oudste gewildste
Stefan

Plaasaanvalle? Watter plaasaanvalle.

marius

Waarom word dit gevra? Die antwoord is mos al jare voor die hand liggend .

Corne123

Dit raak duidelik hulle wil niks aan die probleem doen nie

Oujongvrou

Moenie asem ophou dat hy iets gaan se of doen nie. As die plase erlaat word is dit mos easy pickings vir die ANC en EFF. Sodra daar onteiening plaasvind sal dit eers stop.

Kobus

Lyk my die regering keur die plaasaanvalle goed as hulle niks daarvan sê nie… stilswye is ook ‘n antwoord. Maar as dit nou blankes is wat iets aan ‘n swart persoon gedoen het, dan sal jy nooit die einde daarvan hoor nie. Wys jou net.