‘Plaasaanvaller’ ontsnap ʼn tweede keer

Petros Moyo. Foto: Verskaf

Petrus Moyo, die man wat aangekla is van die moord op dr. Werner Emslie (55) van die Lephalale-omgewing in Limpopo, het na bewering Vrydag ʼn tweede keer uit die polisie se aanhouding ontsnap – dié keer saam met nog ʼn vermeende plaasaanvaller.

Die Heritage Protection Group (HPG) het Vrydag op hul amptelike Facebook-blad gesê Moyo (27) het saam met Witness Shimango uit ʼn polisievoertuig buite Marken ontsnap.

Shimango was glo betrokke by plaasaanvalle in die Leadwood-tafelkoppe-gebied.

Maroela Media het vroeër berig Moyo het op 13 November 2017 deur die nag uit die Lephalale-polisieselle ontsnap nadat hy die versperring van die sel afgesaag het. Die polisie het destyds gesê hulle ondersoek waar Moyo die toerusting gekry het om dit te doen en of hy enige hulp gehad het.

Moyo het vroeër daardie dag in die Lephalale-landdroshof verskyn waar hy teregstaan op aanklagte van moord, huisbraak en diefstal. Die saak is tot 14 Desember uitgestel vir verdere ondersoek en hy is nie borgtog toegestaan nie.

Daar is vasgestel Moyo, ʼn Zimbabwiër, is onwettig in die land, en ná sy ontsnapping is daar gevrees dat hy terug na sy tuisland kan vlug. Hy is op 15 November weer in hegtenis geneem.

Witness Shimango. Foto: Verskaf.

Moyo is aanvanklik op 18 Oktober in Frankfort in die Vrystaat in hegtenis geneem ná volgehoue pogings deur die Lephalale-polisie se taakspan, speurders, misdaadintelligensie-eenheid en Heritage Protection Group (HPG). Buiten die aanval op Emslie, en sy vrou, dr. Mariette Emslie (55), word Moyo glo ook verbind met huisroof- en inbraaksake in Lephalale en Frankfort.

Die Emslie-egpaar en hul dogter, Barbara (19), ʼn eerstejaar- mediese student aan Tukkies in Pretoria, is op 20 September 2017 omstreeks 20:00 deur vier gewapende mans op hul plaas in die Afguns-omgewing aangeval. Mariëtte is ʼn algemene praktisyn op die dorp en Werner was ʼn geliefde boer en doktor in bedryfsgesondheid.

Werner is koelbloedig doodgeskiet terwyl hy buite sy huis op die stoep gesit het. Mariëtte is in die lewer geskiet en moes met ʼn helikopter na die Muelmed-hospitaal in Pretoria gebring word waar sy gestabiliseer is. Sy kan ná die skietery nie loop nie. Barbara is nie tydens die aanval ernstig beseer nie.

Die verdagtes het met twee vuurwapens en die egpaar se bakkie van die toneel gevlug. Die bakkie is later verlate buite die plaas gekry.

Maroela Media wag op terugvoer van kol. Moatshe Ngoepe, provinsiale woordvoerder van die polisie.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

29 Kommentare

jongste oudste gewildste
Afrikaner

Die tyd het ryp geword dat die polisie wat verantwoordelik is vir dit toegesluit moet word.

Petro

Dit is darem net te toevallig dit is n inside job

willie

Kan jy so maklik ontsnap? Ek ruik ñ rot!

leser

hoe kry hulle dit reg om uit ‘n polisie voertuig (vangwa) te ontsnap, anders om gehelp te wees, nie van jan rap en sy maat nie, maar van die polisielede
ek glo die meeste mense weet hoe die vangwa se deur se sluitstelsels werk

Erica

Net om weer te gaan moor…. Die is net onaanvaarbaar.