Plaasaanvallers dalk sélf wit boere – Malema  

Julius Malema, leier van die EFF. (Foto: Twitter)

Julius Malema het Donderdag tydens die aanhoor van AfriForum se siviele saak oor die gewraakte lied “Skiet die boer” voorgestel dat dit nie noodwendig EFF-lede is wat verantwoordelik is vir plaasmoorde nie, maar dat dit dalk wit boere self is.

Hy het selfs daarop gesinspeel dat dit moontlik Ernst Roets, hoof van beleid en aksie by AfriForum, self kan wees wat die gewraakte woorde “Skiet die boer” op moordtonele verf.

“Wat as dit [Ernst] Roets was wat dit geverf het?” wou hy weet. Roets het verlede week getuig oor die wesenlike toename in aanvalle en moorde in die maande nadat die lied by geleenthede gesing is.

Malema meen daar is kompetisie onder wit boere en dat die aanvallers moontlik boere kon wees. “Wat as die oortreder dié woorde gebruik het om die aandag van hom af te lei en die polisie op ’n dwaalspoor te neem? Net omdat daar EFF geskryf staan, beteken nie noodwendig dat die EFF dit outomaties gedoen het nie. Die vyande van die EFF kan dit ook doen,” het Malema getuig.

“Sal jy dit veroordeel en beveel dat ’n lid van die EFF nié hierdie woorde op ’n muur mag verf nie? wou Mark Oppenheimer, AfriForum se regsverteenwoordiger, toe by Malema weet.

“Enige EFF-persoon wat iemand doodmaak, is ’n moordenaar en moet daarvoor veroordeel word,” was Malema se antwoord.

Oppenheimer het egter daarop gewys dat hy spesifiek wil weet of Malema die gebruik van graffiti – die skryf van pro-EFF-opmerkings – veroordeel?

“Nee, ek sal nie. Graffiti is deel van die struggle. Ons het dit al baie gebruik,” was die politieke leier se antwoord. Hy het wel gesê hy sal dit veroordeel indien ’n lid van die EFF die moordenaar is en dan die opmerkings op mure skryf. “Ons is geen party van moordenaars nie.”

Plaasmoorde ‘nie rasgedrewe’

‘n Bakkie waarop ‘Kill the Boer’ gespuit is. (Foto: Facebook)

Oppenheimer het ook die wrede moord van ’n Vrystaatse ma en dogter wat in 2009 ure lank geteister is voordat hulle vermoor is en hul bloed gebruik is om “Skiet die boer” op die mure te skryf, aan Malema voorgelê.

“Wat is jou reaksie hierop?” wou Oppenheimer weet.

“Dit is misdadigheid,” het Malema geantwoord. Hy het egter geweier om dit as ’n rassisties gedrewe moord te bestempel en self verwys na ’n voorval waar ’n wit boer ’n swart tienerseun wreed vermoor het.

Volgens Malema was die motief van dié betrokke moord wel rassisties gedrewe “aangesien die boer sy mag op ’n kwesbare kind uitgeoefen het”.

Oppenheimer wou toe weet of Malema dieselfde sal sê in die geval van die twee vroue. “Was die martelaars van hierdie twee vroue in ’n posisie van mag?”

“My edelagbare. Ons weet nie of hulle (die vroue) boere was nie. Ons weet nie wat hul sosiale aansien was nie. Sonder daardie feite sal ek net sê dis moord,” het Malema gesê.

“Dit wys net vir my hoe siek jou ideologiese posisie is,” het Oppenheimer daarop geantwoord. “Jy sê dat jy eers moet weet of daardie vroue werkersklas is voordat jy kan sê of daar ʼn magsverhouding is? Dit is verregaande. Dit is so duidelik vir elke persoon in hierdie hof dat iemand wat ’n ander doodmartel, mag oor hulle uitoefen en jy wil dit nie erken nie. Kan jy nie die probleem daarmee insien nie?

“Jou definisie van mag is so naïef en oppervlakkig,” was Malema se antwoord op Oppenheimer se vraag.

• Malema se getuienis is vanmiddag afgesluit. Die saak is tot Vrydag uitgestel wanneer die respondente na verwagting hul tweede getuie sal roep.