Plaasmoord: Advokaat tydens plaasaanval vermoor

Argieffoto

Adv. Tom Sawyer (63) is Maandag op sy plaas Oudehoutdraai naby Greylingstad in Mpumalanga vermoor.

“Sy moord kom as ʼn groot skok vir ons. Die enigste misdade waaraan ons hier rond gewoond is, is goed soos kabeldiefstal,” het ʼn boer uit die omgewing, Wynand Ambrosius, gesê. Ambrosius het Maandagoggend op sy goeie vriend se bebloede liggaam afgekom.

Hy het Dinsdag aan Maroela Media gesê Sawyer se werkers het die oggend onraad vermoed toe hy nie soos oudergewoonte vir hulle die hek van sy plaas oopgemaak het nie. “Hulle het boonop deur die hek gesien sy slaapkamervenster is stukkend, en het my kom roep,” het Ambrosius bygevoeg.

Ambrosius self het nog ʼn buurman en die polisie ontbied. Hulle het saam gaan ondersoek instel.

“Ek het saam met die polisie in die huis ingegaan en gesien sy slaapkamer is geplunder. Die gordyne het ook op die grond gelê. Die kamer was baie deurmekaar. Ek het dadelik so ongemaklike gevoel gekry. Ons het Tom se liggaam onder die gordyne langs sy bed aangetref. Sy hande was agter sy rug vasgemaak.”

Sawyer was reeds dood toe Ambrosius en die polisie by die toneel opgedaag het. Hy is in sy bolyf geskiet. Hy is vermoedelik ook met ʼn plank aangerand. Sy vuurwapens, ʼn skootrekenaar en selfoon word vermis.

Sawyer bly al byna 20 jaar lank op sy plaas en het met beeste, skape en wildsbokke geboer. Hy laat sy vervreemde vrou, Estelle, en twee dogters agter.

Brig. Selvy Mohlala, ʼn polisiewoordvoerder van die Mpumalanga, het die voorval aan Maroela Media bevestig. “Die polisie ondersoek ʼn saak van moord. Die polisie is besig om leidrade op te volg en hoop om binnekort ʼn deurbraak te maak,” het hy gesê. Volgens Mohlala is dit nie bekend hoeveel mense by die aanval betrokke was nie.