Plaasmoord-aktivis op hoewe vermoor

Annette Kennealy (Foto: Facebook)

ʼn Aktivis teen plaasmoorde is Maandagoggend op ʼn kleinhoewe buite Louis Trichardt in Limpopo vermoor. Sy is vermoedelik met ʼn hamer doodgeslaan.

Annette Kennealy (51) se liggaam is omstreeks 09:00 op die Welgevonden-kleinhoewes met ernstige kopbeserings aangetref.

Luidens inligting deur Marius Müller, nasionale operasionele koördineerder van AfriForum, aan Maroela Media verskaf, het Kennealy se ma haar aanhoudend gebel en onraad begin vermoed toe haar dogter nie antwoord nie.

Sy het gevolglik iemand gisteroggend uitgestuur na die kleinhoewe waar Kennealy saam met ʼn werker woon. Dit is hiér waar die betrokke persoon Kennealy se liggaam aangetref het.

Kennealy het op haar maag gelê en het beserings aan haar linkeroog asook ʼn oop wond aan haar voorkop gehad. ʼn Hamer het op die toneel gelê en sy het ook ʼn ysterstaaf om haar nek gehad.

Luidens die inligting ontvang is daar geen teken van die werker nie.

Kim Labuschagne, Kennealy se ma, het aan Maroela Media gesê sy het nog Saterdagmiddag saam met haar dogter deurgebring waarna Kennealy haar by haar huis op die dorp afgelaai het. “Sy wou nie inkom nie en het gesê dat sy haastig huis toe is. Sy het later die middag vir my laat weet dat sy veilig by die huis is.”

Die landbouorganisasie TLU SA het die moord op Kennealy ten sterkste veroordeel.

Annette Kennealy (Foto: Facebook)

Henk van de Graaf, TLU SA se streeksvoorsitter, het in ʼn verklaring gesê Kennealy het haar daartoe verbind om die gruwel van plaasmoorde en -aanvalle aan die groot klok te hang en het uitstekende werk in dié verband gedoen.

“As iemand soos Kennealy, wat as ’n aktivis bekend was, self die slagoffer word, kan ʼn mens nie wonder of daar meer agter die motief was as net ’n ‘gewone’ plaasmoord nie,” lui die verklaring.

“Die feit dat sy slegs dae gelede nog plaasmoordsyfers [op haar Facebook-blad] bekend gemaak het, laat die vermoede ontstaan dat hier meer agter dit sit.”

Dit is duidelik op Kennealy se Facebook-blad dat die dreigende kwessie van plaasmoorde haar na aan die hart gelê het en sy haarself daarvoor beywer het om bewusmaking te skep.

Kennealy het onder meer verlede week haar afgryse op dié blad uitgespreek oor die plaasaanval wat die lewe van ʼn boer naby Bonnievale in die Wes-Kaap geëis het.

TLU SA het ʼn beroep op die landbougemeenskap gedoen om hulle paraatheid op te skerp.

Lt.kol. Moatshe Ngoepe, woordvoerder van die polisie, het die voorval bevestig. Maroela Media wag op kommentaar.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

64 Kommentare

jongste oudste gewildste
Boxer

Drie plaasmoord berigte op eendag? Hulle is besig om nou die boere verkeerd op te vryf. Ons is nie “walking targets” vir die klomp nie. Ons gaan moet begin terug baklei

$

Hoeveel trane is genoeg vir hierdie land????????

Johan

Ek kon nie hierdie berig lees sonder om lelik te vloek van woede nie. Ek dink die algemene beskawingsvlak van ons land het gedaal tot laaste in die wêreld!

PJC

Hierdie moord dui daarop dat daar ń duidelike agenda agter plaasaanvalle is. As ń mens dit nie wil insien nie is jy dom of wederstrewig.

Antjie

Ek ruik lont