‘Plaasmoorde steeds nie prioriteitsmisdaad’

Genl. Bheki Cele, minister van polisie (Foto: ANA)

AfriForum het Bheki Cele, minister van polisie, daarvan beskuldig dat hy plaasmoorde as probleem ontken deur dit nie tot ʼn prioriteitmisdaad te verklaar nie te midde van berigte dat vier ander soorte misdaad glo tot prioriteitsmisdade verklaar is.

EWN berig dat Cele Dinsdag met beamptes van misdaadintelligensie vergader het en die prioriteite waarop hulle moet fokus geïdentifiseer het. Volgens die berig het Cele gesê transitorooftogte, bendegeweld, politieke moorde en taxigeweld moet aandag geniet. Hy het glo ook verwys na die toename in ontvoerings en rooftogte.

Ian Cameron, AfriForum se veiligheidshoof, het intussen in reaksie hierop gesê Cele se stilswye en apatie teenoor plaasaanvalle- en moorde dui daarop dat die regering in wese dié misdade deprioritiseer.

“Ondanks meer as 195 plaasaanvalle vanjaar het Cele steeds nie plaasmoorde tot prioriteitsmisdade verklaar nie. Taxigeweld, politieke moorde, transitorooftogte en bendegeweld is deur Cele tot prioriteitsmisdade verklaar. Hy het plaasmoorde egter nie eens genoem nie,” het hy gesê.

Fanie en Colleen Engelbrecht

Cameron meen dat die staat en veral die minister se ontkenning van die erns van plaasaanvalle en -moorde in die land daarop dui dat hulle geen ag slaan op die omvang van die krisis nie.

Volgens Cameron kom die aankondiging nadat hy Dinsdag die toneel aan die Wes-Rand besoek het waar Fanie (78) en Colleen (74) Engelbrecht op 13 Mei vanjaar wreed gemartel en vermoor is.

“Colleen is onder meer met ’n strykyster gebrand voordat sy verwurg en haar keel afgesny is. Dit is net één van die sprekende voorbeelde van ’n familie wat verwoes is weens die staat se onvermoë om mense in landelike gebiede te beveilig,” het Cameron bygevoeg.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

26 Kommentare

jongste oudste gewildste
Sp

Dis nie ñ kwessie van onvermoë nie. Die politieke wil is nie daar nie – laat mens nogal wonder …

Paul

Maar ons weet mos, waarom dit verswyg? Dit omdat hulle nie wit boere beskerming wil gee nie, want DAN moet jy vir Julius en die menigte hoor.

Lou

Die regering is deeglik bewus van al die plaasmoorde. Maar dit pas alles in hul groter plan……

Penellope Jones

Uiteraard – dis nie belangrik genoeg nie.
Dalk ook nie ‘n saak wat vir hulle kan stemme werf of hulle ”broederpartye” stil hou nie.

Lee

Ek het nog altyd gedink plaasmoorde word polities aangehits. Dis mos ‘n maklike manier om grond te bekom vir hulle. Glo nie ek is verkeerd nie want hoekom nou stilswye? Taxigeweld is hulle eie skuld want hulle ry roetes wat hulle nie mag nie. Wag en kyk waar jou kos vandaan gaan kom as daar nie meer boere in SA is nie. Ons Regering doen aan ons boere presies wat Zimbabwe gedoen het, hulle gaan nog lang trane huil.