Plafonne by twee hospitale se kraamsale stort ineen

Argieffoto

Plafonne by twee Gautengse hospitale het Donderdag en Vrydag ineengestort en twee mense beseer.

Khutso Rabothata, woordvoerder vir die LUR vir die provinsie se departement van gesondheid, het gesê die voorvalle het onderskeidelik in die kraamsale van die Tembisa-hospitaal, tussen Pretoria en Johannesburg, en die Pholosong-hospitaal in Tsakane, suidoos van Brakpan plaasgevind.

“ ʼn Gedeelte van die kraamsaal by die Tembisa-hospitaal het Donderdag ineengestort. Geen pasiënte het beserings opgedoen nie, maar ʼn werker het wel geringe beserings aan haar hande opgedoen. Sy is dadelik deur dokters bygestaan en x-strale toon sy het geen frakture opgedoen nie,” het Rabothata gesê.

Hy het gesê die voorval by die Pholosong-hospitaal het Vrydag in die badkamer van die kraamsaal plaasgevind waar nóg ʼn werker geringe beserings opgedoen het.

“Al die personeel wat in die kraamsale gewerk het tydens die voorvalle, sal traumabehandeling ontvang. Ons is ook bly dat geen pasiënt of personeellid ernstige beserings opgedoen het nie.”

Alle pasiënte in die betrokke sale is na veiliger sale oorgeplaas. Albei kraamsale is toegemaak vir verdere evaluering en herstelwerk wat gedoen moet word. Die departement het ʼn gebeurlikheidsplan in werking gestel om pasiënte by te staan.

Die publiek wat navrae het oor hoe dienste by die hospitale geraak word, kan Nothando Mdluli by 083 428 1138 bel.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

21 Kommentare

jongste oudste gewildste
Cherokee

Geboortes in die staat se kraamsale is nou plafon-hoogte.

skorra

Sou die babas jou werklikwaar die dakke afgeskree het?

Tersia

Wat van die pasiente gaan hulle nie ook berading kry nie. Dit moes ook traumaties vir hulle gewees het. So val alles in en uitmekaar in SA. Eish

E

Een van 2 opsies:
Los dit tot dit breek.
Die goedkoopste kontrakteur kry die werk.

Alida

Verkeerde tenders vir verkeerde mense of instandhouding.