Polisie, boere keer verdagtes vinnig aan ná Vrystaat-plaasaanval

Die vier verdagtes wat in hegtenis geneem is. Foto: SAPD

Die vier verdagtes wat in hegtenis geneem is. Foto: SAPD

Vier verdagtes is in hegtenis geneem kort nadat ʼn vrou Maandagaand op ʼn plaas in die Vrystaat aangeval en beroof is.

Kapt. Zweli Mohobeleli, polisiewoordvoerder, het aan Maroela Media gesê die middeljarige vrou is omstreeks 18:00 op ʼn plaas in die Roodekraal-omgewing naby Arlington oorval.

Drie gewapende verdagtes het na bewering binne die huis weggekruip en die vrou in die kombuis ingewag.

“Toe sy daar opdaag, het hulle haar oorval en vasgebind,” het Mohobeleli gesê.

Die verdagtes het die vrou na die badkamer gedwing en ook beveel om ʼn kluis uit te wys, waarna hulle ʼn pistool gesteel het. Die vrou kon omstreeks 19:00 daarin slaag om te ontsnap waarna sy hulp ontbied het.

“ʼn Lid van die publiek het kort daarna vier verdagtes gesien toe hulle te voet gevlug het en hy het alarm gemaak.”

Boere, veiligheidsmaatskappye, snuffelhonde en die polisie is vinnig gemobiliseer en twee van die verdagtes is kort daarna naby ʼn informele nedersetting opgespoor en in hegtenis geneem. Nog twee verdagtes is Dinsdag in die omgewing aangekeer.

Die polisie het beslag gelê op die gesteelde pistool en twee vuurwapens wat in die verdagtes se besit gevind is.

Volgens Mohobeleli is die vrou met geringe beserings na ʼn hospitaal in Bethlehem geneem en reeds ontslaan.

Die verdagtes moet Woensdag in die Lindley-landdroshof verskyn op aanklag van huisroof.

Die vuurwapens waarop beslag gelê is. Foto: SAPD

Die vuurwapens waarop beslag gelê is. Foto: SAPD

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

39 Kommentare

jongste oudste gewildste
Basjansen

Dis n belaglike aanklag, oor n maamd is hulle uit en dan moor hulle.

A

Wat skrikwekkend is is die ouderdom van hierdie misdadigers. Wat gaan or 10 jaar gebeur. Werkloosheid verhoog en so die misdaad in ons land

Renske

My vraag is… hoe weet hulle van die vuurwapens van die mense wat hulle so aanval. Orals lees mens van die wat hulle steel en hulle weet dis daar. Word die inligting aan hulle verkoop deur vuurwapen lisensie kantoor? En ook wat word van die vuurwapens nadat dit by hulle gevat word? Wonder maar net.

Peet J

Ek wonder hoe het die lid van die publiek die polisie en veiligheidsmaatskappye so vinnig gemobiliseer om op te tree die vrou is gelukkig dat sy nog met haar lewe daarvan afgekom het.

Gerhard de V

Aangekeer, sodat die “staat” hul onskuld kan bewys.