Polisie en AfriForum vat hande in geveg teen misdaad

Lt.genl. Khomotso Phahlane en Kallie Kriel, Afriforum se uitvoerende hoof. Foto: Jhua-Nine Wyrley-Birch.

Lt.genl. Khomotso Phahlane en Kallie Kriel, Afriforum se uitvoerende hoof. Foto: Jhua-Nine Wyrley-Birch.

AfriForum en die Suid-Afrikaanse Polisiediens het Maandag ’n geskiedkundige ooreenkoms gesluit om ʼn geïntegreerde benadering te volg om veiligheid uit te bou en gemeenskapsamewerking in die bekamping van misdaad te versterk.

Dié ooreenkoms vorm die hoogtepunt van ontmoetings tussen die twee organisasies, met die oog op die verbetering van wedersydse kommunikasie en skakeling, asook om probleme in terme van misdaad gesamentlik te identifiseer en op te los.

Die partye onderneem in die samewerkingsooreenkoms om:

  • mekaar wanneer nodig en waar toepaslik behulpsaam te wees;
  • met mekaar te skakel om vas te stel hoe AfriForum sy aktiwiteite met die strategiese doelwitte van die polisie kan belyn; en
  • te verseker dat inligting wat van gevestigde AfriForum-gemeenskapsveiligheidstrukture verkry is en wat die polisie behulpsaam kan wees om misdaad te voorkom, bestry en ondersoek, met mekaar gedeel word.
Lt.genl. Khomotso Phahlane en Ian Cameron onderteken die  samewerkingsooreenkoms. Foto: Jhua-Nine Wyrley-Birch.

Lt.genl. Khomotso Phahlane en Ian Cameron onderteken die samewerkingsooreenkoms. Foto: Jhua-Nine Wyrley-Birch.

Ian Cameron, hoof van gemeenskapsveiligheid by AfriForum, het gesê dat dié ooreenkoms ruimte skep vir beter kommunikasie tussen AfriForum en die polisie, asook die geleentheid vir beide instellings om meer inligting met mekaar te deel in die poging om misdaad in die land te bekamp.

“Die polisie het AfriForum se veiligheidstruktuur Maandagoggend amptelik as vennoot in die geveg teen misdaad erken. Deur dié tipe samewerking kan ons van Suid-Afrika ’n veiliger plek maak,” het Cameron gesê.

Lt.genl. Khomotso Phahlane, waarnemende nasionale polisiekommissaris, het gesê dat die polisie verbind is tot die voorkoming en bestryding van misdaad oor alle gemeenskappe heen.

“Ons het in die afgelope jaar met AfriForum geskakel en bevestig dat hierdie struktuur ’n belangrike rol te speel het in die deel van inligting, asook met aktiwiteite teen misdaad en ondersteuning aan die polisie om geïdentifiseerde gemeenskappe by aktiwiteite teen misdaad te betrek,” het Phahlane gesê.

“Deur die implementering van die Back to Basics-benadering het die polisie by herhaling bevestig dat die vestiging van vennootskappe oor alle gemeenskapsfere heen ’n integrale rol speel in die versekering dat almal in Suid-Afrika veilig is en voel.

“Die samewerkingsooreenkoms tussen die polisie en AfriForum is een van die tasbare uitkomste van dié benadering, wat daarop gemik is om na alle gemeenskappe in ons multikulturele omgewing uit te reik,” aldus Phahlane.

AfriForum en die polisie sien uit na ’n langdurige en produktiewe verhouding wat tot voordeel sal strek van alle gemeenskappe wat hulle bedien.

Afriforum en die SAPD het vandag 'n samewerkingsooreenkoms onderteken. Foto: Jhua-Nine Wyrley-Birch.

Afriforum en die SAPD het vandag ‘n samewerkingsooreenkoms onderteken. Foto: Jhua-Nine Wyrley-Birch.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

18 Kommentare

jongste oudste gewildste
Jean

Goedso Afriforum, ten minste probeer julle. Ek hoop julle gaan baie suksesvol wees. Meeste mense moan net en doen niks, dankie dat julle iets daaraan probeer doen. Almal praat saam, maar is nie bereid om te help nie.

Theresa B

Jip – darem probeer Afriform. Maar ja ek glo ook aan feetjies………………………………

Rens Roodt

wat n joke!!!

Anoniem

Joke..jip..Daar is dan soveel misdaad onder ons polisiemag!

jean

Blah, blah, blah….en almal klap handjies.!! (Dankie in elk geval vir wat julle alles probeer doen A Forum!)