Polisie fynkam toneel ná skrywer se dood

Lede van die polisie se forensiese span op die toneel. Foto: Raahil Sain/ANA

Mark Minnie se seun het vroeër vandeesmaand gesê sy pa het hom in iets begewe wat sy dood kan beteken.

Minnie, een van die skrywers van die omstrede boek, Die seuns van Bird Island, is Maandagaand dood aangetref op ʼn plaas aan die buitewyke van Port Elizabeth. Speurders en ʼn forensiese span was Dinsdagoggend op die toneel.

Minnie, ʼn oudspeurder, het glo kort voor sy dood ʼn vriend gevra of hy na die plaas kan gaan omdat hy “ʼn bietjie wil wegkom van die stad af” en “vars plaaslug” nodig het. Hy is omstreeks 20:50 dood gevind met ʼn skietwond en ʼn vuurwapen langs hom. ʼn Geregtelike doodsondersoek word gedoen.

Mark Minnie. Foto: NB Uitgewers

Markus Mordiac, Minnie se seun, het vroeër die maand in ʼn inskrywing op Facebook sy bewondering vir sy pa uitgespreek. Hy het verder ook gesê sy pa is nou besig met iets wat sy dood kan beteken.

“Toe my pa die boek voltooi het, het hy vir my ʼn kopie gestuur. Ek het deur die eerste twee hoofstukke gekom en toe opgehou lees. Trane en ʼn swaar hart, wetend dat my pa op pad was om hom in iets te begewe wat sy einde kan beteken,” het Mordiac op 5 Augustus geskryf.

“Ons het nog altyd ons uiteenlopende menings en ʼn teenoorgestelde uitkyk op die lewe gehad,” het hy voortgegaan. “Ek het nooit verstaan hoekom was hy so kwaad, maar tog so beskermend teenoor my terwyl ek grootgeword het nie. Hierdie storie het regtig my perspektief verander. Ek is bly jy het die moed gehad om dit uiteindelik uit die donkerte te bring. My gebede gaan uit na al die slagoffers en ek hoop diegene wat verkeerd gedoen het sal eendag hul straf sal kry. Ek is lief vir jou pa, hou jou kop omhoog. Jy verdien dit,”

Die plaas waar Minnie dood gevind is. Foto: Raahil Sain/ANA

Die gesoute joernalis Marianne Thamm, wat ook by die skryf van Bird Island betrokke was, het intussen op Twitter hulde aan Minnie gebring. “Ek is platgeslaan deur sy dood. Iets is nie reg nie,” het sy geskryf. “Mark jy was ʼn brawe man en jy het jou dogter en seun liefgehad en jy was so gelukkig en trots. Jou moed sal [die krag] wees wat hierdie ding voortdryf.”

NB Uitgewers het ook sy skok uitgespreek oor Minnie se dood. Tafelberg-uitgewers (ʼn druknaam van NB Uitgewers) het Bird Island uitgegee.

“Geskok en hartseer om te hoor van die dood van Mark Minnie. Tafelberg wil sy innige meegevoel betuig in die moeilike tyd. Hy was passievol oor sy werk as polisieman, onderwyser en skrywer.”

Minnie is saam met Steyn, ʼn voormalige ondersoekende joernalis, outeurs van die boek Die seuns van Bird Island wat opslae veroorsaak het nadat dit verlede week bekendgestel is. Dié boek beweer dat drie voormalige ministers van die Nasionale Party in die 80’s by pedofilie betrokke was. Daar word in die boek beweer die destydse polisie-ondersoeke na genl. Magnus Malan, ʼn voormalige minister van verdediging, sowel as John Wiley, ʼn voormalige minister van omgewingsake, en ʼn derde minister wat nog leef en wie se naam op regsadvies weerhou word, se betrokkenheid glo verhoed en toegesmeer is.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

36 Kommentare

jongste oudste gewildste
Slegte Nuus

Jip en kyk wat het nou gebeur.

bgj van der westhuizen

ja nou sal die boek verkoop wand hy is mos dood gemaak en dit bewys dat dit waar was sonder dat daar regtig bewys is wat hy geskryf het waar was

Yankee

Het dit verwag. “Verwyder” die ene wat sal getuig in n moontlike hofsaak wat kan kom.

Willem

Briefie is op toneel gevind.

willie

Ek ruik ñ rot!